މިފްކޯ އަށް އަލުން ސީއީއޯއެއް ހޯދަނީ

މިފްކޯ އަށް ސީއީއޯއެއް ހޯދަން އަލުން އިއުލާންކޮށްފި އެވެ.

ސަރުކާރުގެ މަސް ކުންފުންޏަށް ބޭރުގެ ސީއީއޯއެއް ހޯދަން ފުރަތަމަ އިއުލާންކުރީ މިދިޔަ ޖޫން މަހުގެ ތެރޭގަ އެވެ. ނަމަވެސް ފަހުން އެ އިއުލާން ބާތިލުކުރި އެވެ. އެއީ ޝަރުތު ހަމަވާ ކެންޑިޑޭޓަކު ކުރިމަތިލާފައި ނުވާތީ އެެވެ.

ޕްރައިވަޓައިޒޭޝަން އެންޑް ކޯޕަރޭޝަން ބޯޑު (ޕީސީބީ) އިން ބުނީ މިފްކޯގެ ސީއީއޯގެ މަގާމަށް އަލުން ހުޅުވާލައި ކުރިމަތިލުމުގެ ފުރުސަތު މިހާރު އަންނަ މަހުގެ 8 އާ ހަމައަށް އޮންނާނެ ކަމަށެވެ.

މަގާމަށް މީހަކު ހޮވާނީ ގާބިލްކަމާއި ތަޖުރިބާއަށް ބެލުމަށް ފަހު އެވެ.

ޕީބީސީން ބުނީ ހަތަރު އަހަރަށް އައްޔަންކުރާ ސީއީއޯ އަސް މުސާރައިގެ ގޮތުގައި މަހަކު 12،000 ޑޮލަރު (185،040ރ.) އާއި 15،000 ޑޮލަރު (231،300ރ.) ދެމެދުގެ މުސާރައެއް ލިބޭނެ ކަމަށެވެ.
މިދިޔަ ޖޫން މަހު ޕީސީބީން ކުރި އިއުލާނުގައި ބުނީ، މިފްކޯގެ ސީއީއޯގެ މަގާމަށް ހުޅުވާލައި މުއްދަތު ހަމަވި އިރު މަގާމުގެ ޝަރުތު ހަމަވާ ކެންޑިޑޭޓަކު ކުރިމަތިލާފައިނުވާ ކަމަށެވެ. އެހެންވެ އެ އިއުލާން ވަނީ ބާތިލްކޮށްފަ އެވެ.

މިފްކޯގެ ސީއީއޯގެ މަގާމުގައި އެންމެ ފަހުން ހުންނެވީ އަހުމަދު ސަމާހު ރަޝީދެވެ. އެ މަގާމު ހުސްވީ އޭނަ މަގާމުން ވަކިކޮށް، ފަހުން ފިޝަރީޒް މިނިސްޓްރީގެ ސްޓޭޓް މިނިސްޓަރަކަށް އައްޔަން ކުރުމާ ގުޅިގެންނެވެ.