ފަސްޓް ލޭޑީ ސާޖިދާ މުހައްމަދު އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) އަށް ޒިޔާރަތް ކުރައްވައިފި އެވެ.
އެކަމަނާ އެތަނަށް ޒިޔާރަތްކުރައްވައި ހޮސްޕިޓަލްގެ އެކިއެކި ޑިޕާޓްމަންޓްތަކުގެ މުވައްޒަފުންނާ ވެސް ބައްދަލު ކުރައްވައި މަސައްކަތްތައް ކުރިއަށްދާ ގޮތް ބައްލަވާލެއްވި އެވެ.
ދެހާސް ވިހިން ފެށިގެން ހިންގަމުން އަންނަ އޭއީއެޗަކީ އަތޮޅުތެރޭގެ ފުރަތަމަ ޓާޝަރީ ހޮސްޕިޓަލެވެ. އެތަނުގެ ސީއީއޯގެ މަގާމުގައި މިހާރު ހުންނެވީ މި ސަރުކާރުން އައްޔަންކުރި ޑރ. އިބްރާހީމް ޔާސިރެވެ.
އޭއީއެޗަކީ އައްޑޫގައި 2011 ގައި 17 ވަނަ ސާކް ސަމިޓް ބާއްވަން ހެދި ކޮންވެންޝަން ސެންޓަރަށް ބޮޑެތި ބަދަލުތަކެއް ގެނެސްގެން ހިންގަން ފެށި ހޮސްޕިޓެލެކެވެ. އެ އިމާރާތް ހޮސްޕިޓަލަކަށް ބަދަލުކުރެއްވީ ކުރީގެ ރައީސް އަބްދުﷲ ޔާމީންގެ ވެރިކަމުގައި މިހާރުގެ ރައީސް އަދި ސާޖިދާގެ ފިރިކަލުން ޑރ. މުހައްމަދު މުއިއްޒު ހައުސިން މިނިސްޓަރަކަށް ހުންނެވި އިރު، އެ މަނިކުފާނުގެ ބެއްލެވުމުގެ ދަށުންނެވެ.
ފަސްޓް ލޭޑީ އައްޑު އަށް ވަޑައިގަތީ އިއްޔެ އެވެ. އެއީ އޭއީއެޗުން އިންތިޒާމުކޮށްގެން އިއްޔެ ބޭއްވި "ނެޝަނަލް ސޭފްޓީ ކޮންފަރެންސް 2024" ޝަރަފުވެރިކޮށް ދެއްވުމުގެ ގޮތުންނެވެ.