އިންޑިއާގެ މަޝްހޫރު ޓީވީ އެކްޓަރު އަރުޖުން ބިޖްލާނި އަންހެނުން ނޭހާ ސްވާމީއާ އެކީ ރާއްޖޭގައި ޗުއްޓީ ހޭދަކުރަމުން އެބަދެ އެވެ.
އެ މީހުން ޗުއްޓީ ހޭދަކުރަނީ އެމެރަލްޑް މޯލްޑިވްސް ރިސޯޓް އެންޑް ސްޕާގަ އެވެ. އެތަނުގައި ނަގާފައިވާ ފޮޓޯތަކެއް ދެމަފިރިންގެ އިންސްޓަގްރާމްގައި ވެސް ޕޯސްޓްކޮށްފައިވެ އެވެ. މިއީ އަރުޖުން ރާއްޖެ އަށް ޒިޔާރަތްކުރި ފުރަތަމަ ފަހަރެވެ.
މި އަހަރުގެ ކުރީކޮޅު އިންޑިއާގައި ރާއްޖޭގެ ޓޫރިޒަމް ބޮއިކޮޓް ކުރަން ސޯޝަލް މީޑިއާގައި ކެމްޕޭންތަކެއް ހިންގި އިރު، އަރުޖުން އަކީ ދުވަހަކު ވެސް ރާއްޖެ ނުދާނެ ކަމަށް ބުނި ތަރިއެކެވެ. އޭރު އޭނަ ބުނެފައި ވަނީ ކުރިން ވެސް ރާއްޖެ ގޮސްފައި ނުވާނެ ކަމަށާއި ދެން އަމުދަކުން ރާއްޖެ ނުދާނެ ކަމަށެވެ.
ނަމަވެސް އެ ވާހަކަ "އުނބަށް" ޖަހައި އަރުޖުން އަންހެނުންނާ އެކީ ރާއްޖޭގައި ޗުއްޓީ ހޭދަކުރަމުން ނަގާފައިވާ ފޮޓޯތަކުގެ ކެޕްޝަނަށް ލިޔެފައި އިނީ "އިފް އައި އޭމް ޑްރީމިން. ނޯބަޑީ ޕިންޗް މީ" އެވެ.
އަރުޖުން އަކީ އިންޑިއާގެ މިހާރު އެންމެ މަޝްހޫރު ޓީވީ އެކްޓަރުންގެ ތެރެއިން އެކެކެވެ. ދެހާސް ބާވީހުގައި ކަލާސް ޓީވީގެ ސްޓަންޓް ރިއަލިޓީ ޝޯ "ހަތުރޯން ކޭ ކިލާޅީ" ގެ 12 ވަނަ ސީޒަން ވެސް ކާމިޔާބުކޮށްފައިވާ 41 އަހަރުގެ އެކްޓަރުގެ އެންމެ ފަހުގެ ސިލްސިލާ އަކީ މިދިޔަ މަހު ޒީޓީވީން ނިންމައިލި "ޕިޔާރު ކާ ޕެހެލާ އަދާޔާ: ޝިވް ޝަކްތީ" އެވެ.
އަރުޖުން ކުޅެފައިވާ އިތުރު ސިލްސިލާތަކުގެ ތެރޭގައި "މިލޭ ޖަބް ހަމް ތުމް"، "ތޭރީ މޭރީ ލަވް ސްޓޯރީސް"، "ޔޭ ހޭ އާޝިގީ"، "ނާގިން" އަދި "އިޝްގް މޭ މަރުޖާވާ" ހިމެނެ އެވެ.
މިދޔަ އަހަރު ރިލީޒްކުރި ކަރަން ޖޯހަރްގެ "ރޮކީ އޯރް ރާނީ ކީ ޕްރޭމް ކަހާނީ" ގެ ހާއްސަ ފެނިލުމެއްގައ ވެސް ހިމެނޭ އަރުޖުން އަކީ ކަލާސް ޓީވީން މިހާރު ގެނެސްދޭ "ލާފްޓާ ޝެފްސް: އަންލިމިޓެޑް އެންޓަޓައިންމަންޓް" ގެ ވެސް ބައިވެރިއެކެވެ.
އަރުޖުން އާއި ސްނޭހާ ކައިވެނިކުރީ 2013 ގަ އެވެ. އެ ކައިވެންޏަށް ލިބިފައިވާ އަޔާން ބިޖްލާނީ އަށް މިހާރު 9 އަހަރެވެ.