ކަލާސް ޓީވީ ސްޓަންޓް ރިއަލިޓީ ޝޯ "ހަތުރޯން ކޭ ކިލާޅީ" ގެ 14 ވަނަ ސީޒަން ޓީވީ އެކްޓަރު ކަރަން ވީރް މެހެރާ ކާމިޔާބުކޮށްފި އެވެ.
ރޭ ގެނެސްދިން ކުލަގަދަ ފިނާލޭ ޝޯގައި މެހުމާނުންގެ ގޮތުގައި އަންނަ މަހު ރިލީޒްކުރަން ހަމަޖެހިފައިވާ ފިލްމު "ޖިގްރާ" ގެ ތަރިން ކަމަށްވާ އާލިއާ ބަޓާއި ވެދާންގް ރައިނާ ބައިވެރިވި އެވެ.
މަޝްހޫރު ޑައިރެކްޓަރު ރޯހިތު ޝެޓީ ހޯސްޓްކޮށް ގެނެސްދޭ "ހަތުރޯން ކޭ ކިލާޅީ" ގެ 14 ވަނަ ސީޒަން ކަރަން ކާމިޔާބުކުރި އިރު، މި ސީޒަންގެ ދެވަނަ ލިބުނީ ބޮލީވުޑްގެ ތަރި ޓައިގާ ޝްރޮފްގެ ކޮއްކޮ ކްރިޝްނާ ޝްރޮފަށެވެ. އަދި ތިން ވަނަ ލިބުނީ ގަޝްމީރު މަހާޖަންއަށެވެ.
ޖުލައި މަހުގެ 27 ވަނަ ދުވަހުގެ ރޭ ޕްރީމިއާކުރި ޝޯ މި ފަހަރުގެ ޝޯ ގެނެސްދިނީ ރުމޭނިއާއިންނެވެ.
އިންޑިއާގެ އެންމެ މަގުބޫލު ރިލިއަޓީ ޝޯތަކުގެ ތެރޭގައި ހިމެނޭ "ހަތުރޯން ކޭ ކިލާޅީ" ގެ 13 ވަނަ ސީޒަން މިދިޔަ އަހަރު ކާމިޔާބުކުރީ ޑީޖޭ ޑީނޯ ޖޭމްސް އެވެ.
މި ޝޯ އަކީ އެމެރިކާގެ މަޝްހޫރު ޝޯ "ފިއާ ފެކްޓާ" ގެ އިންޑިއާގެ ވާޝަނެވެ.
"ހަތުރޯން ކޭ ކިލާޅީ 14" ރޭ ނިންމައިލުމާ ގުޅިގެން ދެން އެންމެ އަވަހަށް ކަލާސް އަށް އަންނަ ރިއަލިޓީ ޝޯ އަކީ ސަލްމާން ޚާން ހޯސްޓްކުރާ "ބިގް ބޮސް" އެވެ. މީގެ 18 ވަނަ ސީޒަން ޕްރީމިއާކުރަން ހަމަޖެހިފައި ވަނީ އަންނަ މަހުގެ 6 ވަނަ ދުވަހުގެ ރޭގަ އެވެ.