ރާއްޖޭގައި އުޅޭ ހުރިހާ ބިދޭސީންގެ މައުލޫމާތު އެއްކުރަން ސަރުކާރުން ފަށާފައި އޮތް "ކުރަނގި" އޮޕަރޭޝަން ފުވައްމުލަކުގައި ކުރިއަށް ގެންދިއުމާ ގުޅޭ ގޮތުން މަޝްވަރާކޮށްފި އެވެ.
ފުވައްމުލައް ސިޓީ ކައުންސިލާ އެކީ ބޭއްވި ބައްދަލުވުގައި ހޯމްލޭންޑް މިނިސްޓްރީ އާއި އިމިގްރޭޝަނާއި ފުލުހުންނާއި ލޭބާ ރިލޭޝަން އޮތޯރޮޓީން ބައިވެރިވި އެވެ. އެގޮތުން ބައްދަލުވުގައި ވަނީ ފުވައްމުލަކުގައި ތިބި ބިދޭސީންގެ މައުލޫމާތު އެއްކުރުމާ ގުޅޭ ގޮތުން ފުޅާ ދާއިރާއެއްގައި މަޝްވަރާކޮށްފަ އެވެ.
ފުވައްމުލަކަކީ ރާއްޖޭގެ އެންމެ ދެކުނުގެ އެއް ސިޓީ އެވެ. އަދި ސިޓީގެ އެކި ދާއިރާތަކުގައި ގިނަ އަދަދެއްގެ ބިދޭސީން މަސައްކަތް ކުރަމުން ގެންދެ އެވެ.
"ކުރަނގި" އޮޕަރޭޝަނަކީ ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމުގެ ގޮތުން ފެށި ޕްރޮގްރާމެކެވެ. މި އަހަރުގެ ޖޫން މަހުގެ 2 ގައި މި ޕްރޮގްރާމް ރަސްމީކޮށް އިފުތިތާހުކުރީ ކ. މާފުށިންނެވެ. އޭގެ ފަހުން އެ އަތޮޅު ހިންމަފުށީގެ އިތުރުން ލ. އަތޮގައި ވެސް ޖުލައި މަހުގެ ތެރޭގައި "ކުރަނގި" ޕްރޮގްރާމް ފެށި އެވެ.
ހޯމްލޭންޑް މިނިސްޓްރީން މުޅި ރާއްޖެ އަށް ފުޅާކުރަން ނިންމާފައިވާ އިރު، ކައުންސިލްތައް މެދުވެރިކޮށް ބިދޭސީންގެ މައުލޫމާތު އެއްކުރެވޭނެ އިންޔިޒާމުތަކެއް ވެސް އޮތީ ހަމަޖައްސައިފަ އެވެ.
"ކުރަނގި" އޮޕަރޭޝަންގެ މަގުސަދަކީ ގަވާއިދާ ޚިލާފަށް އުޅޭ ބިދޭސީންގެ މައްސަލަތަކަށް ތިން އަހަރު ދުވަހުގެ ތެރޭގައި ހައްލު ހޯދުމެވެ. އެގޮތުން މަރުހަލާތަކަކަށް ކުރިއަށް ގންދާ އޮޕަރޭޝަންގެ ފުރަތަމަ މަރުހަލާގައި، ބިދޭސީ މަސައްކަތްތެރިންގެ މައުލޫމާތު އަހަރު ދުވަހުގެ ތެރޭގައި އެއްކުރާނެ އެވެ.