އާޓްސް އެންޑް ކަލްޗަ ސެންޓަރެއް ޤާއިމުކުރުމަށް އަމާޒުކޮށް މޯލްޑިވިސް ޕޮލިޓެކްނިކާއި ބިޒްނަސް ސެންޓަ ކޯޕަރޭޝަން (ބީސީސީ) އިން އެއްބަސްވުމެއްގައި ސޮއިކޮށްފި އެވެ.
މި އެއްބަސްވުމުގައި އިއްޔެ ޕޮލިޓެކްނިކްގެ ފަރާތުން ސޮއިކުރެއްވީ ސިއީއޯ، ޛޫޝާން ކަމާލުއްދީނެވެ. އަދި ބީސީސީގެ ފަރާތުން މި އެއްބަސްވުމުގައި ސޮއިކުރެއްވީ އެ އިދާރާގެ ޗީފް ސްޓްރެޓެޖިކް އޮފިސަރު މަރްޔަމް ނަޝާ އެވެ.
"އާޓްސް އެންޑް ކަލްޗަ ސެންޓަރު" ގެ ނަމުގައި، ރާއްޖޭގެ ސަޤާފަތާއި ތަރިކަ ރައްކާތެރިކުރުމާއި، އުފެންދުންތެރި ވިޔަފާރިވެރިންނަށް ފުރުސަތުތަށް ފަހިކޮޑް ދިނުމާއި، ޒުވާނުން ސަޤާފީ ކަންކަމަށް ހޭލުންތެރިކުރުވުމަށް އަމާޒުކޮށް ޤާއިމުކުރާ މި މަރުކަޒަކީ ބީސީސީ އާއި ޕޮލިޓެކްނިކް ގުޅިގެން ހިންގުމަށް ހަމަޖެހިފައިވާ މަރުކަޒެކެވެ.
އެގޮތުން އެ މަރުކަޒާ ގުޅޭ ގޮތުން އާންމުން ހޭލުންތެރިކުރުވައި، ވިޔަފާރިވެރިންނާއި އެކި ޖަމިއްޔާ ޖަމާޢަތްތަކާއި ގުޅިގެން މި މަރުކަޒުގައި ތަފާތު ގިނަ ހަރަކާތްތަކެއް ބޭއްވުމަށް ވެސް ހަމަޖެހިފައިވެ އެވެ.