އައްޑޫގެ ކައުންސިލަރުންތަކެއް މާލެ ވަޑައިގެން ސަރުކާރުގެ އެކިއެކި މިނިސްޓްރީތަކާއި މުއައްސަސާތަކާ ބައްދަލު ކުރަމުން އެބަގެންދެވަ އެވެ.
ކައުންސިލްގެ މި ދަތުރުގައި ބައިވެރިވެވަޑައިގަންނަވަނީ ތިން ކައުންސިލަރެކެވެ.
އެއީ މޭޔަރު އަލީ ނިޒާރާއި ހިތަދޫ މޫލެކެޑެ ދާއިރާގެ ކައުންސިލަރު އަހުމަދު ސައީދުގެ އިތުރުން ހުޅުދޫ ކައުންސިލަރު ފައިޒުއްރަހްމާނެވެ.
ކައުންސިލަރުންގެ މި މާލެ ދަތުރުގެ ތެރެއިން އިއްޔެ ދެ މިނިސްޓްރީއަކާ ބައްދަލުކޮށްފައިވެ އެވެ. އެއީ އިސްލާމިް މިނިސްޓްރީ އާއި އިދާރީ ދާއިރާތަކާ ބެހޭ މިނިސްޓްރީއާ އެވެ. ދެ މިނިސްޓްރީއާ އެކީ ބޭއްވި ބައްދަލުވުންތަކުގައި ވެސް މިނިސްޓްރީތަކުގެ ފަރާތުން އިސްކޮށް ތިއްބެވީ އެ މިނިސްޓްރީތައް ހިންގަވާ މިނިސްޓަރުންނެވެ.
މީގެ އިތުރުން އިއްޔެ ކައުންސިލަރުން ވަނީ ރާއްޖޭގައި ހުންނަވާ ޗައިނާގެ ސަފީރު ވަންގް ލިޒިންއާ ބައްދަލު ކުރައްވައި ހަންކެޑެ ޕްރޮޖެކްޓާއި ޗައިނާ އިން ގަމަށް ދަތުރުތަކެއް ފެށުމާ ގުޅޭ ގޮތުން ވެސް މަޝްވަރާތަކެއްކޮށްފަ އެވެ.