"މަގޭ ދަރިފުޅަކީ ކިހާވަރެއްގެ ކުޅަދާނަ ދަރިއެއް ހެއްޔެވެ. ހުނަރުވެރިއެއް ހެއްޔެވެ؟" ވަރަށް ގިނަ ފަހަރަށް މައިންބަފައި ހިތާހިތުން ނަމަވެސް ސުވާލުކޮށްލައެވެ.
އެއްވެސް އިންސާނަކީ ހުރިހާ ހުނަރެއް ލިބިފައިވާ، ނުވަތަ ހުރިހާކަމެއް ކުރަން އެނގޭ މީހަކަށްވުން އެއީ ނާދިރުކަމެކެވެ. އެންމެ މޮޅު މީހާއަށް ވެސް ގިނަ ފަހަރަށް މޮޅަށް ކުރެވެނީ އެންމެ ކަމެއް ނުވަތަ ދެ ކަމެކެވެ. އެހެންކަމުން އެފަދަގޮތަކަށް ދަރިފުޅާއި ދޭތެރޭ ދެކުމީ ހިޔަންޏަށް މުޑިނެގުން ފަދަ ކަމެކެވެ. އަދި އޭގެ ސަބަބުން ދަރިފުޅުގެ މުސްތަޤްބަލަށާއި، އަމިއްލަ ނަފްސަށް ވެސް ނޭދެވޭ އަސަރު ކުރާނެ ކަމެކެވެ.
މާތް ﷲ މިބިންމަތީގައި ކަންކަން ލަހައްޓަވާފައިވަނި ވަކި އުސޫލްތަކަކާއި ތަރުތީބްތަކަކުންނެވެ. ވަރަށް ގިނަފަހަރަށް އެއުސޫލްތަކުގެ އަސާސްތައް ދެނެގަތުމަށް އިންސާނާ ނުކުޅެދެއެވެ.
ކުރެވުނު ވަރަކުން ކޮންމެ މީހަކު ވެސް އެމީހެއްގެ ދަރިއެއްގެ ގައިގައި ގުދްރަތުން ލައްވާފައިވަނީ ކޮންކޮން ނިއުމަތް ތަކަކާއި ހުނަރުތަކެއްތޯ ދެނެގަންނަން މަސައްކަތް ކުރަން ޖެހެއެވެ. އެއީ، ދަރިފުޅުގެ މުސްތަޤްބަލް އެކަންކަމުގެ މައްޗަށް ބިނާކޮށްދީ މަގުފަހި ކޮށްދިނުމަށް ޓަކައެވެ. އަދި ކަންކަމަށް ހިތްވަރު ދިނުމުގެ ގޮތުންނެވެ. އަދި އިލާހީ އެފަދަ ނިޢުމަތްތަކުގެ މައްޗަށް ޝުކުރުވެރިވެ ނަފްސަށް ހިތްހަމަޖެހުން ލިބިގަތުމަށެވެ.
***
މިގޮތުން މިތާގައި މިފާހަގަ ކުރަނީ، އެމެރިކާގެ ޖަމްއިއްޔާއެއް ކަމުގައިވާ، ނޭޝަނަލް އެސޯސިއޭޝަން އޮފް ގިފްޓެޑް ޗިލްޑްރެން އިން ހަދާފައި ދިރާސާއަކަށް ރިޢާޔަތްކޮށް މިފަދަ 20 ކަމެއްގެ ވާހަކައެވެ.
1. ކަންތައްތައް ފަސޭހައިން، ރަނގަަޅަށް، އަވަހަށް ދަސްކުރޭ
2. އުމުރު ފުރައިގެ އެހެން ކުދިންނާއި އަޅާބަލާއިރު ބަސްކޮށާރު މާބޮޑަށް މުއްސަދި
3. ފެންނަ ކަންކަމާއި ދޭތެރޭ އާދާޔާއި ޚިލާފް ސަބަބުތައް އުފައްދާ
4. ވަރަށް ފަސޭފައިން ހިތުދަސްކުރެވޭ، އެހެންނަމަވެސް ކިޔަންޖެހުނީމާ ފޫހިކޮށްލާ
5. އެހާ ބޮޑަށް ކޮންޓްރޯލް ކުރާކަށް ނުޖެހޭ، އަމިއްލަ ސުލޫކުގައި ހިފަހައްޓާ
6. ޤަވާއިދުން، ވަކި ތަރުތީބަކުން، ކަންކަން ކުރަން ބޭނުންވޭ
7. ވިސްނާއިރު މާދުރުގައި ހުންނަ، ނުވަތަ ނުގުޅޭ ކަންކަމާއި ވެސް ގުޅުވާލާ
8. އެއްޗިއްސާއި، ތަންތަން، އަދި ކަންކަމާއި ގުޅޭގޮތުން ގިނަ ސުވާލު ކުރޭ
9. ޖުމްލަކޮށް ގިނަ މާއްދާތަކަކުން ރަނގަޅު ނަތީޖާ ހޯދާ
10. ކަންކަމާއި ދޭތޭ ފުންކޮށް ވިސްނާ، އަދި ވިސްނާއިރު އެހެން ހުރިހާ ކަމަކުން އެއްކިބާވޭ
11. ކޮންމެ ޙަލަތެއްގައި ވެސް އަތުވެދާނެ ސުވާލަކަށް ތައްޔާރުވާން މަސައްކަތް ކުރޭ
12. އާދަޔާއި ހިލާފްގޮތްތަކަށް ކަންކަން ހައްކުރޭ. ނުވަތަ ކުރަން މަސައްކަތް ކުރޭ
13. ސައިންސާއި ލިޔުންތެރިކަމަކަށް ޚާއްސަ ޝައުޤުވެރިކަމެއް ބަހައްޓާ
14. އަމިއްލަ ފިކުރު މައްޗަށް ލިޔުންތެރިކަމާއި ބަސްމޮށުންތެރިކަން ބަހައްޓަން މަސައްކަތް ކުރޭ
15. ކަންކަން ދަމައިގަނޭ، އަދި އެކަތި އަނެކަތްޗާއި ފަސޭހައިން ގުޅުވާލާ
16. ކަންކަން ކުރާއިރު މާޔޫސް ކަމެއް ނުހުރޭ
17. ކަންކަމުގައި އިސްނަގަން މަސައްކަތް ކުރޭ
18. އާއްމު ސިނކުޑިން ނުވަތަ ގުދްރަތީ ހަގީގަތާއި ގުޅުވާލަން މަސައްކަތް ކުރޭ
19. ދަތިއުނދަގޫ ތަކުގައި ކެތްކުރަން މަސައްކަތް ކުރޭ
20. އަދި ކަންކަމުގައި ހުޅުވިފައިވާ ސިކުނޑިއަކުން ވިސްނަން މަސައްކަތް ކުރޭ
***
ސްކޫލްތަކުގައި ހަދާ އިމްތިޙާންތަކުން ތިމާގެ ދަރިފުޅުގެ ގާބިލިއްޔަތު ހާމަ ނުވާނެކަން މިއަދު ގިނަ ދިރާސާތަކުން ފެންނަން އެބައޮތެވެ. ހުނަރުވެރިކަމަށް ބަލާއިރު، ކްލާސްރޫމެއްގައި އުޅޭ އޮނަތިރީސް ކުދީންގެ މެދުގައި ބޮޑެތި ތަފާތުތައް ހުންނާނެއެވެ. ނަމަވެސް ސްކޫލްތަކުން ބަލަނީ، މިފަދަ ހުނަރުވެރިކަން ކުރިއެރުމަށް ވުރެ ބޮޑަށް އެއް ސްޓޭންޑެޑަކުން ނުވަތަ ޓެސްޓަކުން މިނެކިރުމަށެވެ. އެހެންކަމުން ދަރިވަރުންނަށް އެމީހުން ގުދްރަތީ ގާބިލްކަމާއި އެއްވަރަށް ކުރިއަށް ދާން ދަތިތަކަކާއި ކުރިމަތިލާން ޖެހެއެވެ.
ހަޤީޤީ ހުނަރުވެރިކަމާކީ، ބާއްވާ އިމްތިހާނަކުން އެނގޭނެ އެއްޗެއް ނޫނެވެ، އެކަންތައް އެނގު ހާމަ ވާނީ ލޮލުން ބަލައި ހޯދައިގެން ނެވެ.
ވުމާއެކެ، މިފަދަ ހުނަރުތައް ދެނެގަންނަން މަސައްކަތް ކުރުމީ، މައިންބަފައިން ނޫން ބަޔަކަށް މިއަދު ކޮށްދެވޭނެ ކަމެވެ ނޫނެވެ.