އައްޑޫގެ ގުޅިފައިވާ އަވަށްތަކަށް ފެން އުފައްދާ އާރްއޯ ޕްލާންޓްގެ މަސައްކަތް މި ވަގުތު ހުއްޓިފައިވާ ކަމަށް ފެނަކަ ކޯޕަރޭޝަނުން ބުނެފި އެވެ.
އެ ކުންފުނިން ސޯޝަލް މީޑިއާ ޕޯސްޓެއްގައި ބުނީ ޕްލާންޓްގެ މަސައްކަތް ހުއްޓުނީ އޭގެ ބޯހޯލް ޕަންޕަށް ދިމާވި މައްސަލައަކާ ގުޅިގެން ކަމަށެވެ. އެހެންވެ މައްސަލަ ޙައްލުކޮށް ޕްލާންޓް އޮޕަރޭޝަނަށް ގެނައުމުގެ މަސައްކަތް ކުރަމުން އަންނަ ކަމަށް ފެނަކަ އިން ބުންޏެވެ.
"ނަމަވެސް މައްސަލަ ޙައްލު ވަންދެން ފެން އުފެއްދުން ހުއްޓިފައިވާތީ، އައްޑޫގެ ގުޅިފައިވާ ރަށްތަކަށް ފޯރުކޮށްދޭ ފެން ހުސްވެ، ޚިދުމަތް މެދުކެނޑުމަކީ އެކަށީގެންވާ ކަމެއް." ކުންފުނިން ބުންޏެވެ.
ފެނަކަ އިން ބުނީ މައްސަލަ ޙައްލުވީހާ އަވަހަކަށް ކަސްޓަމަރުންނާ އެ މައުލޫމާތު ހިއްސާ ކުރާނެ ކަމަށެވެ.
އައްޑޫ ސިޓީގެ ގުޅިފައިވާ ރަށްތަކަށް ފެން އުފައްދާ އާރުއޯ ޕްލާންޓުގެ ބޯރހޯލް ޕަންޕަށް ދިމާވި މައްސަލައަކާ ގުޅިގެން ޕްލާންޓް ވަނީ ހުއްޓިފަ. މައްސަލަ ޙައްލުކޮށް ޕްލާންޓް އޮޕަރޭޝަނަށް ގެނައުމުގެ މަސައްކަތް ދަނީ ކުރެވެމުން. ނަމަވެސް މައްސަލަ ޙައްލު ވަންދެން ފެން އުފެއްދުން…
— Fenaka Corporation Ltd (@TeamFenaka) September 30, 2024
"ފެނުގެ ޚިދުމަތް މެދުކެނޑިގެން ދިމާވެދާނެ ދަތިތަކަކަށްޓަކާ، ނިހާތަށް މަޢާފަށް އެދެން." ކުންފުނުން ބުންޏެވެ.
މި އަހަރުގެ ކުރީކޮޅު ވެސް އައްޑޫގެ ގުޅުފައިވާ އަވަށްތަކުގެ ސަޕްލައި ފެނުހެ ހިދުމަތަށް ބުރޫއަރައި އާންމުންނަށް ބޮޑެތި ތަކުލީފުތަކާ ކުރިމަތިލާން ޖެހުނެވެ.
އައްޑޫގެ ފެނުގެ ނިޒާމު އަޕްގްރޭޑްކުރަން މި އަހަރުގެ އެޕްރީލް މަހުގެ 13 ގައި ކޮންސްޓްރަކްޝަން މިނިސްޓްރީން ވަނީ އެމްޑަބްލިއުއެސްސީއާ ހަވާލުކޮށްފަ އެވެ. އަހަރު ދުވަހުގެ ތެރޭގައި ނިންމަން ހަމަޖެހިފައިވާ މަޝްރޫއުގެ އަގަކީ 282.6 މިލިއަން ރުފިޔާ އެވެ.
އެ މަސައްކަތް ފެން ކުންފުނިން އަންނަނީ ކުރަމުންނެވެ.
އައްޑޫގެ ފެނުގެ ހިދުމަތަށް ދޭތެރެ ދޭތެރެ އިން ބުރޫރަމުންދާ އިރު، ފެނަކަ އިން ދޭ އައްޑޫގެ ކަރަންޓް ހިދުމަތަކީ ވެސް ގުޅިފައިވާ އަވަށްތަކުގެ ރައްޔިތުންނަށް ކުރިމަތިވެފައި އޮތް ވަރަށް ބޮޑު ތަކުލީފެކެވެ. އެގޮތުން ކަރަންޓް ކެނޑޭ މައްސަލަ އަކީ މިހާތަނަށް ހައްލު ނުކުރެވި ދިގުލައިގެން ގޮސްފައި އޮތް މައްސަލައެކެވެ.
އައްޑޫގެ ކަރަންޓްގެ ހާލަތު ރަނގަޅު ކުރަން ފެނަކަ އިން ޗައިނާގެ ކުންފުންޏަކާ އެޕްރީލް މަހުގެ ތެރޭގައި ހަވާލުކޮށްފައިވެ އެވެ.