ފިލްމެއްގައި ޒުވާން ބަތަލާ ޓްރިޕްތީ ދިމްރީގެ މަންމަގެ ރޯލު ކުޅެން މަދޫރީ ޑިކްސިޓަށް ހުށަހަޅާފައިވާ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނީ މިއީ އަބުންދާތިއާ އެންޓަޓައިންމަންޓުން ހަދަން ނިންމާފައިވާ ފިލްމެެއް ކަމަށެވެ. އަދި މިއީ ފިލްމު ބަލާ އޯޑިއަންސް ބޭނުންވާނެ އާންމު ހުރިހާ ރަހަތަކެއް ހިމަނައިގެން މަޔަކާއި އަންހެން ދަރިއަކާ ދެމެދު އޮންނަ ބަދަހި ގުޅުންތަކެއް ދައްކުވައި ދޭނެ ފިލްމެއް ކަމަށް ވެސް މީޑިއާތަކުން ބުންޏެވެ.
ނަމަވެސް އަދި ނަން ސާފު ނުވާ ފިލްމު ޑައިރެކްޓްކުރާނީ ސުރޭޝް ތުރިވޭނީ ކަމަށް ބޮލީވުޑް ހަންގާމާ އިން ބުންޏެވެ. އޭނަ އަކީ ވިދިއާ ބާލަންގެ "ތުމާރީ ސުލޫ" އާއި "ޖަލްސާ" ގެނެސްދިން ޑައިރެކްޓަރެވެ.
ޓްރިޕްތީ، 32، ގެ މަންމަގެ ރޯލު މަދޫރީ، 57، އަށް ހުށަހަޅާފައިވާ އިރު، ކުރިއަރަމުން އަންނަ އުންމީދީ ބަތަލާ ލީޑް ބަތަލާގެ ރޯލު ކުޅެފައިވާ އަދި އަންނަ ނޮވެމްބަރު މަހު ރިލީޒްކުރާ "ބޫލް ބުލައްޔާ 3" ގެ ކާސްޓްގައި ވެސް މަދޫރީ ހިމެނޭ ކަމަށް ރިޕޯޓްތައް ބުނެ އެވެ. އެކަމަކު އޭގެ ޓީމުން އެކަން މިހާތަނަށް ކަށަވަރުކޮށް ދީފައެއް ނުވެ އެވެ.
ނޮވެމްބަރު 1 ގައި ރިލީޒްކުރަން ހަމަޖެހިފައިވާ "ބޫލް ބުލައްޔާ 3" ގެ ބަތަލަކީ ކާތިކް އާރިއަނެވެ. އަދި މީގެ ކާސްޓްގައި ވިދިއާ ވެސް ހިމެނެ އެވެ.