މި އަހަރުގެ ކުރީކޮޅު ޓީޒާ ޓްރެއިލާއެއް ވެސް ދައްކާލާފައިވާ ބޮލީވުޑްގެ މަޝްހޫރު ތަރިން ކަމަށްވާ ކާޖޮލް އާއި ކްރިތީ ސެނަންގެ ތުރިލާ "ދޯ ޕައްތީ" އަންނަ މަހުގެ 25 ގައި ނެޓްފްލިކްސް އިން ޕްރީމިއާކުރަން ނިންމައިފި އެވެ.
މިކަން އިއުލާންކޮށް މިއަދު ވަނީ ފިލްމުގެ ޓްރެއިލާއެއް ވެސް ދައްކާލައިފަ އެވެ.
"ދޯ ޕައްތީ" އަކީ 2015 ގެ "ދިލްވާލޭ" އަށް ފަހު ކާޖޮލް އާއި ކްރިތީ އެކީގައި ފެންނަ ފުރަތަމަ ފިލްމެވެ. އަދި ކާޖޮލް ފުލުހެއްގެ ރޯލު ކުޅެފައިވާ މި ފިލްމަކީ ކްރިތީގެ އަމިއްލަ ޕްރޮޑަކްޝަން ހައުސް ބްލޫ ބަޓަފްލައިން އިން ގެނެސްދޭ ފުރަތަމަ ފިލްމެވެ.
"ދޯ ޕައްތީ" ޑައިރެކްޓަރަކީ ޝަޝަންކާ ޗަތުރަވެދީ އެވެ. މި ފިލްމު ހަދާފައި ވަނީ "ހަސީން ދިލްރުބާ" އާއި "މަންމަރްޒިޔާ" އަދި "ރާ.ވަން" ފަދަ މަގުބޫލު ފިލްމުތަކުގެ ސްކްރީން ރައިޓަރު ކަނިކާ ދިލަންގެ ސްކްރީންޕްލޭއަކަށެވެ.