ބޭންކް އޮފް މޯލްޑިވްސް ބީއެމްއެލް) ގެ ކަސްޓަމަރުންތަކެއްގެ އެކައުންޓް ވައްކަން ކުރި ކަމަށް މުވައްޒަފަކު އިއުތިރާވުމާ ގުޅިގެން ލުއި އަބަދެއް ކްރިމިނަލް ކޯޓުން ދީފި އެވެ.
އެ މައްސަލަގައި އެ ކޯޓުން އިއްޔެ 40 ގަޑިއިރު މުޖުތަމައުއަށް ހިދުމަތްކުރުމާއި 56،200ރ. އިން ޖޫރިމަނާކުރަން ހުކުމްކުރީ ބ. އޭދަފުށީ ހިޔާވަހި އަލީ މާޒިންގެ މައްޗަށެވެ. އޭނަގެ މައްޗަށް އިއްވި ޖޫރިމަނާ ތިން މަސް ދުވަހުގެ ތެރޭގައި މީރާއަށް ދައްކަން ޖެހެ އެވެ.
މީގެ އިތުރުބް ބީއެމްއެލްއާއެކު މާޒިން ހަދާފައިވާ އެއްބަސްވުމާ އެއްގޮތަށް ގެއްލުމުގެ ބަދަލުގެ ފައިސާ ދައްކަމުން ގެންދިއުމަށް ވެސް ކޯޓުން އަންގާފައިވެ އެވެ.
ގައުމީ ބޭންކްގެ ކަސްޓަމާ ސާވިސް އެސިސްޓެންޓެއްގެ މަގާމުގައި ހުރެ ލިބިފައިވާ މައުލޫމާތާއި ބާރުގެ ބޭނުންކޮށްގެން މެއި 14 2021 އިން ސެޕްޓެމްބަރު 23 2021 ގެ ނިޔަލަށް އެކި ދުވަސް މަތިން 13 ކަސްޓަމަރެއްގެ އެކައުންް މާޒިން ވައްކަންކޮށްފައވެ އެވެ. އެގޮތުން 13 އެކައުންޓަކުން ޖުމްލަ 4826،11.41ރ. ރުފިޔާ ސައްހަ ނޫން ކްރެޑިޓް ކާޑު ޕޭމަންޓުގެ ގޮތުގަ އާއި ފޮރެކްސް ޓްރާންސެކްޝަނުގެ ގޮތުގައި ނަގައި އަމިއްލަ އެކައުންޓަށް ޖަމާކޮށްފައިވެ އެވެ.
އޭނަ އެ ހިޔާނާތްވެފައި ވަނީ ކަސްޓަމަރުންގެ ހުއްދަ ނެތި ކަސްޓަމަރުންގެ އިންޓަނެޓް ބޭންކިން އަށް ރަޖިސްޓަރީކޮށްގެންނެވެ. މި މައްސަލަގައި ކުރު ދައުވާއާ ގުޅިގެން މާޒިން ވަނީ އޭނަގެ މައްޗަށް ކޮށްފައިވާ ތުހުމަތުތަކަށް އިޢުތިރާފްވެ ޕީޖީ އޮފީހާއެކު އިއުތިރާފްގެ އެއްބަސްވުމެއް ވެސް ހަދައިފަ އެވެ.
ޕީޖީއާއެކު ވެވުނު އެއްބަސްވުމުގެ ބުނެފައި ވަނީ މާޒިންގެ އެ ކުށަކީ ޖިނާޔަތުގެ 4 ވަނަ ދަރަޖައިގެ ކުށެއް ކަމަށާއި އެ ކުށުގެ އަދަބަކީ 1 އަހަރާއި 7 މަހާއި 6 ދުވަހަށް ޖަލަށްލުން ކަމަށެވެ. ނަމަވެސް އިއުތިރާފުގެ އެއްބަސްވުމާއެކު ކޯޓުން މާޒިންގެ މައްޗަށް ޖަލު ހުކުމެއް ނުއިއްވަ އެވެ.