ސަލްމާން ޚާން މިހާރު ކުޅެމުން އަންނަ ފިލްމު "ސިކަންދަރު" އަށް އަންޖިނީ ދަވަން ވެސް ސޮއިކޮށްފައިވާ ކަމަށް ރިޕޯޓްތައް ބުނެފި އެވެ.
މިދިޔަ ހުކުރު ދުވަހު ރިލީޒްކުރި ފިލްމު "ބިނީ އެންޑް ފެމިލީ" އިން ތައާރަފުވި ޒުވާން ބަތަލާ އަކީ މަޝްހޫރު ޒުވާން އެކްޓަރު ވަރޫން ދަވަންގެ ކަޒިންއެއްގެ ދަރިއެކެވެ. އަންޖިނީގެ ބައްޕަ ސިދާތު ދަވަން އަކީ ވަރޫންގެ ބައްޕަ އަދި މަޝްހޫރު ޑައިރެކްޓަރު ޑޭވިޑް ދަވަންގެ ބޭބެ އެކްޓަރު އަނިލް ދަވަންގެ ދަރިއެކެވެ.
އަންޖިނީގެ ފުރަތަމަ ފިލްމު ރިލީޒްކުރި ތަނާހެން ބޮލީވުޑްގެ އެންމެ ވަރުގަދަ ސުޕަސްޓާރުންގެ ތެރޭގައި ހިމެނޭ ސަލްމާންގެ ފިލްމަކުން ފުރުސަތު ލިބުނު ނަމަވެސް "ސިކަންދަރު" ގައި އަންޖިނީ ކުޅޭނީ ކޮން ކަހަލަ ރޯލެއްކަން އަދި ސާފު ނުވާ ކަމަށް މީޑިއާތަކުން ބުނެ އެވެ.
"ބިނީ އެންޑް ފެމިލީ" ގައި އަންޖިނީ، 20، ދައްކާފައިވާ އެކްޓިން އަށް ގިނަ ބަޔަކު ތައުރީފު ކުރަމުން އަންނަ އިރު، މި އާއިލީ ފިލްމަށް އާންމުންގެ ފަރާތުން ބޮޑު ތަރުހީބެއް އަންނަނީ ލިބެމުންނެވެ.
ސަލްމާންގެ "ސިކަންދަރު" އަކީ އޭއާރް މުރްގަދޯސް ޑައިރެކްޓްކުރާ އެކްޝަން ތުރިލާއެކެވެ. ސަލްމާން ޑަބަލް ރޯލެއް ކުޅޭ ފިލްމުގެ ކާސްޓްގައި ރަޝްމިކާ މަންދަނާ، ޝަރުމަން ޖޯޝީ އަދި ކާޖަލް އަގަރްވާލް ހިމެނެ އެވެ.
"ސިކަންދަރު" ސިނަމާތަކަށް ގެންނާނީ އަންނަ އަހަރުގެ ފިތުރު އީދުގަ އެވެ.