ރައީސް ޔާމީންގެ ސަރުކާރުން ޝެއިޚް އިލްޔާސް ހުސައިން ފަހައި ދުވެ އަތުނުވެގެން އެންމެ ފަހުން އެބޭފުޅާ އަށް ދޫކޮށްފައިވާ ދީނީ ދަރުސް ދިނުމުގެ ހުއްދަ ބާތިލްކުރުމަށް މިނިސްޓްރީން މަސައްކަތްކުރަމުން އަންނަ ކަމަށް އަހްމަދު އިބްރާހިމް ދީދީ (ސަންދާން އަހައްމައިދީ) ވިދާޅުވެއްޖެ އެވެ.
ގައުމީ ހަރަކާތުން ސިލްސިލާކޮށް ބާއްވަމުންދާ ޖަލްސާތަކުގެ ތެރެއިން އާދީއްތަ ދުވަހުގެ ރޭ އެމް.ޑީ.ޕީ ޖަގަހައިގައި ބޭއްވި ޖަލްސާގައި ވާހަކަ ދައްކަވަމުން އަހަންމައިދީ ވިދާޅުވީ އިލްޔާސަކީ ދީނީ ދަރުސް ދެއްވުމުގައި ޢިލްމީ ގޮތުން ރާއްޖޭގައި ހުރި އެންމެ ފުންނާބު އުސް ބޭފުޅާ ކަމަށެވެ.
އަހަންމައިދީ ވިދާޅުވީ މި ސަރުކާރަށް ނިސްބަތްވާ ގިނަ ބޭފުޅުންގެ ކިބައިން ފެނިގެންދަނީ މީހުން ފަހާދުވެ އަނިޔާވެރިކަން އިސްކުރަން މަސައްކަތް ކުރަމުންދާ މަންޒަރު ކަމަށެވެ. އެ ގޮތުން ޕީޕީއެމްގެ ރައްޔިތުންގެ މަޖިލީހުގެ މެންބަރު ރިޔާޒް ރަޝީދާއި، ޕީޕީއެމްގެ ޕާލިމެންޓަރީ ގްރޫޕުގެ ލީޑަރު އަހްމަދު ނިހާން ކުރައްވަމުން ގެންދަވާ މަސައްކަތަކީ މޭޑެގޭ މުޒާހަރާއަށް އަތޮޅުތަކުން އައި މީހުން ހޯދައި އެ މީހުން ޖަލަށް ލުމުގެ މަސައްކަތް ކަމަށެވެ.
ހޯމް މިނިސްޓަރު ޢުމަރު ނަސީރަށް އިޝާރާތް ކުރައްވަމުން، އަހަންމައިދީ ވިދާޅުވީ ހޯމް މިނިސްޓަރަކީ ފިޔަ ކޮށާލާފައިވާ ބޭފުޅެއް ކަމަށާއި އެހެން ނަމަވެސް ސިޔާސީ ބޭފުޅުން ފަހާދުވެ އެ މީހުން ހޯދުމުގައި އުމަރު އަވަދިނެތި އުޅުއްވާ ކަމަށް އޭނާ ވިދާޅުވި އެވެ.
ކުރީގެ ރައީސް މައުމޫން އަބުދުލް ގައްޔޫމުގެ ވެރިކަމުގެ ދުވަސްވަރަކީ ރަން 30 އަހަރު ކަމަށް ޕީޕީއެމް އިން ސިފަ ކުރާއިރު، އަހަންމައިދީ ވިދާޅުވި ގޮތުގައި، އެ ރަން 30 އަހަރުގައި މަސްތުވާތަކެތީގެ އަވައިގައި ނުޖެހޭ ކުއްޖަކު ނެތް އާއިލާއެއް ނެތް ކަމަށެވެ.