ތޭރަ ފުލުހަކު ބައިނަލްއަގުވާމީ ތަމްރީނު ޕްރޮގްރާމްތަކެއްގައި ބައިވެރިވުމަށް ފުރައިފި އެވެ.
އެ ފުލުހުން ތުރުކީ އާއި ސިންގަޕޫރު އަދި ޔޫއޭއީގައި ހާއްސަ ތަމްރީނުތަކެއް ފުރިހަމަކުރާނެއެވެ. މި ތަމްރީންތަކަކީ ގާނޫނު ތަންފީޒުކުރުމާއި، ލީޑަޝިޕް އަދި ފުލުހުންގެ މަސައްކަތުގެ އެކި ދާއިރާތަކުން މީހުން ބިނާކޮށް ހުނަރު އިތުރުކުރުމަށް ކުރިއަށްގެންދާ ތަމްރީންތަކެއް ކަމަށް ފުލުހުންގެ އިދާރާ އިން ބުންޏެވެ.
ތުރުކީގައި ތަމްރީނު ފުރިހަމަކުރުމަށް ހޮވުނު 10 ފުލުހުން އެ ގައުމުގެ ނެޝަނަލް ޕޮލިސް އެކަޑަމީން އިންތިޒާމުކޮށްގެން ހިންގާ ދެ ތަމްރީނު ޕްރޮގްރާމެއްގައި ބައިވެރިވާނެ އެވެ. އެ މީހުން ބައިވެރިވާނީ އަންޑަގްރެޖުއޭޓް އަދި މާސްޓާސް ލެވެލްގެ ތަމްރީނު ޕްރޮގްރާމްތަކެއްގަ އެވެ.
އަންނަ މަހުގެ 7 އިން ސެޕްޓެންބަރު 30، 2026 އަށް ހިންގޭ ފަސްޓް ސްޓޭޖް ސުޕަވައިޒރ ތަމްރީނު އަދި ނޮން-ތީސިސް މާސްޓަރސް ޕްރޮގްރާމްގައި ސާޖަންޓް މުޙައްމަދު އަފްރާޙް، ސާޖަންޓް ޢާއިޝަތު ރަފްޝާ، ސާޖަންޓް އަޙްމަދު އަމީން ރަޝީދު، ސާޖަންޓް މުޙައްމަދު މިފްރާޙް އަދި ކޮންސްޓަބަލް ފާޠިމަތު ހަމްލާ ބައިވެރިވާނެ އެވެ.
ދެ އަހަރުގެ މި ޕްރޮގްރާމްގައި ހިމެނެނީ އެއް އަހަރުގެ ތުރުކީ ބަހުގެ ތައްޔާރީ ކޯހަކާއި، އިންސާނީ ހައްގުތަކާއި ފުލުހުންގެ މަސައްކަތް، ޓެރަރިޒަމް، ފުލުހުންގެ ލީޑަޝިޕް އަދި ސެކިއުރިޓީ މެނޭޖްމަންޓް ފަދަ މޮޑިއުލްތައް ހިމެނޭ މާސްޓަރސް ލެވެލްގެ މުގައްރަރެކެވެ.
މީގެ އިތުރުން، ބައިވެރިން ފިޒިކަލް ޓްރޭނިންގ އާއި، ހަތިޔާރު ބޭނުންކުރުމުގެ ތަމްރީނު އަދި ޓެކްޓިކަލް ތަމްރީނުތައް ވެސް ފުރިހަމަކުރާނެއެވެ.
މީގެ އިތުރުން، އަންނަ މަހުގެ 7 އިން ސެޕްޓެންބަރު 30، 2029 އަށް ހިންގާ އަންޑަގްރެޖުއޭޓް ތަމްރީނު ޕްރޮގްރާމް (ބެޗްލަރސް) ގައި ފަސް ފުލުހަކު ބައިވެރިވާނެ އެވެ. އެގޮތުން ކޮންސްޓަބަލް އަޒާން އަޙްމަދު، ކޮންސްޓަބަލް ޙަސަން އަނަސް ނާފިޒު، ކޮންސްޓަބަލް އިންޝާ އިސްމާޢީލް ޖިހާދު، ކޮންސްޓަބަލް އިބްރާހީމް ޞަލާޙް އަދި ކޮންސްޓަބަލް ޙުސައިން ޔާސިރު މި ތަމްރީނު ފަށާނީ އެއް އަހަރުގެ ތުރުކީ ބަހުގެ ތައްޔާރީ ކޯހަކުންނެވެ.
އޭގެ ފަހުން ގާނޫނު، ސިޔާސަތު، މެނޭޖްމަންޓް އަދި ކްރިމިނޮލޮޖީ ފަދަ މާއްދާތައް ހިމެނޭ ބެޗްލާސް ޑިގްރީ ޕްރޮގްރާމެއް ފުރިހަމަކުރާނެ އެވެ. މާސްޓަރސް ޕްރޮގްރާމްގެ ބައިވެރިންނެކޭ އެއްފަދައިން، މި ފުލުހުން ވެސް ފިޒިކަލް ޓްރޭނިންގ އާއި ހަތިޔާރު އަދި ޓެކްޓިކަލް ތަމްރީނުތައް ވެސް ފުރިހަމަ ކުރާނެ އެވެ.
ސިންގަޕޫރު ޕޮލިސް ފޯސްއިން ހިންގާ ސީނިއާ އޮފިސަރުންގެ އަސާސީ ކޯހުގައި ސަބް-އިންސްޕެކްޓަ އޮފް ޕޮލިސް އަޙްމަދު ތައުސީފް އަދި ސަބް-އިންސްޕެކްޓަރ އޮފް ޕޮލިސް އާދަމް ފަތުޙީ، ސިންގަޕޫރު ޕޮލިސް ފޯސް އިން ހިންގާ ސީނިއަ އޮފިސަރުންގެ އަސާސީ ކޯހުގައި ބައިވެރިވާނެ އެވެ. މިއަދުން ފެށިގެން އަންނަ އަހަރުގެ ޖޫން 30 އަށް ހިންގާ 10 މަސްދުވަހުގެ މި ތަމްރީނު ޕްރޮގްރާމް ފަރުމާކުރެވިފައި ވަނީ ބައިވެރިންގެ ލީޑަޝިޕާއި ޓެކްޓިކަލް ހުނަރުތައް އިތުރު ކުރުމަށެވެ.
މި ރެސިޑެންޝަލް ކޯހުގައި ހިމެނެނީ ފުލުހުންގެ ޑިފެންސް ޓެކްޓިކްސް، ފިޒިކަލް ޓްރޭނިން، ގާނޫނު އަދި ލީޑަޝިޕް މާއްދާތަކެވެ. މީގެ އިތުރުން ބޭރު އެހެން ގައުމެއްގައި ކުރިއަށްދާ ބައެއް ވެސް މި ޕްރޮގްރާމްގައި ހިމެނެ އެވެ.
އަބޫދާބީ ހިންގާ ކްސްޗޭންޖް ޕްރޮގްރާމްގައި ކޮންސްޓަބަލް ޢާއިޝަތު ޒޫނާ މުޙައްމަދު ބައިވެރިވާނެ އެވެ. ވަނީ ޔޫއޭއީގެ އިންޓީރިއާ މިނިސްޓްރީއާ ގުޅިގެން އަބޫދާބީ ޕޮލިސް ކޮލެޖުން އިންތިޒާމުކުރާ މި ޕްރޮގްރާމް ކުރިއަށްދާނީ މާދަމާ އިން ފެށިގެން އަންނަ އަހަރުގެ ޖެނުއަރީ 31 އަށެވެ.
މި ހަތަރު މަސް ދުވަހުގެ ރެސިޑެންޝަލް އެކްސްޗޭންޖް ޕްރޮގްރާމްގައި ހިމެނެނީ ފިޒިކަލް ޓްރޭނިން އާއި، މާޗިން ޑްރިލްސް، ފުލުހުންގެ މަސައްކަތުގެ އަމަލީ ތަމްރީނުތައް އަދި އިލްމީ ދިރާސާތަކެވެ.