ދެކުނު ކޮރެއާގެ އަންހެނަކަށް އުމުރުން 81 އަހަރުގައި މިސް ޔުނިވާސް މުބާރާތުގައި ބައިވެރިވުމުގެ ފުރުސަތު ލިބިއްޖެ އެވެ.
މިއީ ދުނިޔޭގައި ދެވަނަ އަށް ބާއްވާ އެންމެ ބޮޑު ރީތީގެ މުބާރާތް 1952 ގައި ބާއްވަން ފެށި ފަހުން، އުމުރުން އެހާ ދުވަސްވީ މީހަކު މުބާރާތުގައި ވާދަކުރާ ފުރަތަމަ ފަހަރެވެ.
އެގޮތުން އަންނަ ނޮވެމްބަރު މަހުގެ 16 ގައި މެކްސިކޯގައި ބާއްވާ 73 ވަނަ މިސް ޔުނިވާސްގައި ކޮރެއާ ތަމްސީލުކޮށް ދޭނީ އެ މިސް ޔުނިވާސް ކޮރެއާ، ޗޮއި ސޫން-ވާ އެވެ. އޭނަގެ 81 ވަނަ އުފަން ދުވަސް ފާހަގަކުރާނީ އަންނަ މަހުގެ ތެރޭގަ އެވެ.
އުމުރުން އެހާ ދުވަސްވެފައި ހުއްޓައި ވެސް މިސް ޔުނިވާސްގައި އަމިއްލަ ގައުމު ތަމްސީލުކޮށް ދޭން ލިބުނު ތާރީހީ ޝަރަފާ ގުޅިގެން ޗޮއި ބުނީ އޭނަ މުޅި ދުނިޔެ އަށް ސާބިތުކޮށް ދޭން ބޭނުން ވަނީ އުމުރަކީ ހަމައެކަނި ނަމްބަރެއްކަން ކަމަށެވެ. އުމުރަށް ވުރެ މާ ޒުވާންކޮށް ފެންނަ އަދި ސިއްހަތު ވެސް ވަރަށް ރަނގަޅުކޮށް ހުރި ޗޮއި ބުނި ގޮތުގައި މިސް ޔުނިވާސްގައި ވާދަކޮށްގެން ދޭން ބޭނުންވާ އެންމެ މުހިއްމު މެސެޖަކީ އުމުރުން ކިތަންމެ ދުވަހެއް ވިޔަސް ދުޅަހެޔޮ ލައިފްސްޓައިލަކާ އެކީ ހިތްގައިމު ހަޔާތެއް ކޮންމެ މީހަކަށް ވެސް ހޯދިދާނެކަން ކަމަށެވެ.
"އުމުރުން ކިތަން،މެ ދުވަހެއް ވިޔަސް މީހާ އަށް ޒުވާންކޮށް ދުޅަހެޔޮ ސިއްހަތެއްގައި ހުރެވިދާނެކަން އަހަރެން ބޭނުން ދުނިޔެ އަށް ދައްކުވައި ދޭން،" ސީއެންއެން އަށް ދިން އިންޓަވިއުއެއްގައި ޗޮއި ބުންޏެވެ. "އަހަންނަކީ އޭގެ މިސާލަކަށް ވެދާނެ."
އޭނަ ބުނި ގޮތުގައި މި ފަހަރުގެ މިސް ޔުނިވާސްގެ ސްޓޭޖް މަތިން އޭނަ ފެނުމަކީ ދުވަސްވީ އެތައް އަންހެނުންނަށް ލިބޭނެ ވަރަށް ހިތްވަރަކަށް ވާނެ ކަމަށް ގަބޫލުކުރާ ކަމަށެވެ. އެހެންވެ ކުރިއަށް އޮތް ތަނުގައި މި މުބާރާތަށް ވާދަކުރަން ނުކުންނަ ދުވަސްވީ މީހުން އިތުރުވާ ތަން ދެކެން ބޭނުންވާ ކަމަށް ތިން މާމަދަރިން ވެސް ތިބި ޗޮއި ބުންޏެވެ.
"މިހާރު ކެތްމަދުވެފައި މި ހުންނަނީ މިސް ޔުނިވާސް ސްޓޭޖް މައްޗަށް އަރަން،" އޭނަ ބުންޏެވެ. "މިއީ ހަގީގަތުގައި ހުވަފެނެއް ހަގީގަކަށްވުން."
ޗޮއި ބުނި ގޮތުގައި މިކަމާ ކުރިމަތިލި އިރު، އެންމެ ބޮޑަށް ހިތްވަރު ދޭ ބަޔަކީ އާއިލާ އެވެ. ހާއްސަކޮށް ދަރިންގެ ސަޕޯޓް ވަރަށް ބޮޑު ކަމަށް ބުންޏެވެ.
މިހާތަނަށް މިސް ޔުނިވާސްގައި ވާދަކުުރަން ފުރުސަތު ދެމުން އައީ އުމުރުން 18-28 އަހަރާ ދެމެދުގެ ހުސްހަށިބައި އަންހެނުންނަށެވެ. ނަމަވެސް މިސް ޔުނިވާސް މުބާރާތް މި ޒަމާނުގެ ފިކުރާއި ވިސްނުމާ އެއްގޮތަށް ބަދަލު ކުރަން ޖެހޭ ކަމަށް ގިނަ ބަޔަކު ގޮވަމުން ދިއުމާ ގުޅިގެން މި އަހަރުން ފެށިގެން ވަނީ މުބާރާތުގައި ވާދަކުރަން އޮތް ހަނި ފުރުސަތި ފުޅާކޮށްފަ އެވެ. އެގޮތުން އުމުރުން ކިތަންމެ ދުވަސްވީ މީހުންނަށް ވެސް މިހާރު މުބާރާތަށް ވާދަކުރުމުގެ ފުރުސަތު އޮންނާނެ އެވެ. މީގެ އިތުރުން ކައިވެނިކޮށްގެން އުޅޭ އަންހެނުންނާއި މާބަނޑު އަންހެނުންނަށް ވެސް މުބާރާތުގައި ވާދަކުރެވިދާނެ އެވެ.
މިސް ޔުނިވާސް މުބާރާތުގައި 31 ގައުމަކުން ރީތީގެ ރާނީން ވާދަކުރާނެ އެވެ.