"އަނިޔާ ނިންމަން" ޖޫން މަހުގެ 12 ވަނަ ދުވަހު މާލެގައި ބާއްވާ އެއްވުމުގައި ބައިވެރިވާން ބޭނުން އެންމެން މާލެ ގެންނާނެ ކަމަށް އެމްޑީޕީން ބުނެފިއެވެ.
އެމްޑީޕީ ހަރުގޭގައި ރޭ ކުރިއަށް ގެންދިއަ ޖަލްސާގައި އެޕާޓީގެ ފަރާތުން ހާމަކޮށްފައިވާގޮތުގައި ސަރުކާރުން ކިތަންމެ މަސައްކަތެއް ކުރި ނަމަވެސް ރައީސް މުހައްމަދު ނަޝީދު އާއި އެހެންވެސް ސިޔާސީ ބޭފުޅުން ޖަލުގައި ބަންދުކޮށްފައި ބައިތިއްބާހައި ދުވަހަކު އެބޭފުޅުން މިނިވަން ކުރުމަށް އިދިކޮޅު ފަރާތްތަކުން ކުރަމުން ގެންދާ މަސައްކަތްތައް ނުހުއްޓުވޭނެ ކަމަށެވެ. އަދި ރާއްޖޭގައި އަދުލުވެރި ވެރިކަމެއް ޤާއިމުކުރެވެންދެން ރައްޔިތުން ގެންދާނީ އަޑު އުފުލަމުން ކަމަށެވެ.
ރޭގެ ބައްދަލުވުމުގައިވެސް ވަނީ އަދާލަތު ޕާޓީގެ ރައީސް އައްޝައިޚް އިމްރާން ޢަބްދުﷲ އާއި ކުރީގެ ޑިފެންސް މިނިސްޓަރ ކާނަލް ރިޓަޔަރޑް މުޙައްމަދު ނާޒިމް މިނިވަން ކުރުމަށް އަދި ޖުމްހޫރީ ޕާޓީގެ ލީޑަރު ޤާސިމް އިބްރާހީމްއަށް ކުރަމުން ގެންދާ އަނިޔާތައް ހުއްޓައިލުމަށް ސަރުކާރަށް ތަކުރާރުކޮށް ގޮވައިލާފައެވެ.
އެމްޑީޕީން ބުނީ ޖޫން 12 ވަނަ ދުވަހުވެސް ގިނަ ބައަކު މަގުތަކަށް ނުކުންނާނެކަމަށާއި ގެއްލިފައިވާ ރައްޔިތުންގެ ހައްޤުތައް ޙޯދަން މަސައްކަތްކުރާނެ ކަމަށެވެ. އަދި ރާއްޖެތެރޭ ރަށްރަށުން މިފަހަރުވެސް ގިނަ ބައަކު މާލެ އައިސް އެއްވުމުގައި ބައިވެރިވާނެ ކަމަށެވެ.
އެމްޑީޕީ އިން މިގޮތަށް ބުނެފައިވާއިރު، ވިލިފުށީ ދާއިރާގެ މެންބަރ ރިޔާޒް ރަޝީދު ވަނީ 'ރާއްޖެތެރޭ' މީހުންނަށް މާލެ ނާދެވޭނެ ކަމަށް ބުނެ އިންޒާރު ދީފައިކަން ފާހަގަކޮށްލެވެއެވެ.