ރާއްޖޭގެ ތަރައްގީއަށް ޗައިނާއިން އަބަދުވެސް އެއްބާރުލުން ދޭނެ ކަމަށް ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ވަން ލީޝިން ވިދާޅުވެއްޖެ އެވެ.
ޗައިނާގެ 75 ވަނަ ޤައުމީ ދުވަހުގެ މުނާސަބަތުގައި ބޭއްވި ރިސެޕްޝަނުގައި ވާހަކަދައްކަމުން ސަފީރު ވިދާޅުވީ ރާއްޖެއާއި ޗައިނާގެ ގުޅުމަކީ، ކުޑަ ގައުމަކާއި ބޮޑު ގައުމެއްގެ ދެމެދު އޮންނަންޖެހޭ ގުޅުމުގެ ރަނގަޅު މިސާލެއް ކަމަށާއި އެ ގުޅުމަކީ އިތުބާރާއި އިހުތިރާމްގެ މައްޗަށް ބިނާވެފައިވާ، ދެ ގައުމަށް ފާގަތިކަން ގެނެސްދޭ ގުޅުމެއް ކަމަށެވެ.
މި ގުޅުމުގެ ތެރެއިން ރާއްޖޭގެ އުމްރާނީ ތަރައްގީގެ ބޮޑެތި މަޝްޜޫއުތައް ކުރިއަށް ގެންގޮސް، ތަރައްގީގެ ރޮނގުން ރާއްޖެއަށް ބޮޑު ކުރިއެރުންތަކެއް ލިބިފައިވާ ކަމަށް ސަފީރު ވިދާޅުވި އެވެ. އެގޮތުން ސަފީރު ވަނީ ޗައިނާއިން ރާއްޖޭގައި ކުރިއަށް ގެންގޮސްފައިވާ ބައެއް މަޝްރޫއުތައް ފާހަގަކޮށް، ރާއްޖޭގެ ތަރައްގީއަށް ޗައިނާއިން އަބަދުވެސް ފުރިހަމަ އެއްބާރުލުން ދޭނެ ކަމަށް ވިދާޅުވެފަ އެވެ.
މީގެއިތުރުން ރައީސް ޑރ. މުޙައްމަދު މުއިއްޒު ޗައިނާއަށް ކުރެއްވި ފުރަމާނަ ދަތުރުފުޅާއެކު ދެ ގައުމުގެ ގުޅުން އައު ހަރުފަތަކަށް ގެންދެވިފައިވާ ކަމަށްވެސް ސަފީރު ވިދާޅުވި އެވެ.
ޗައިނާގެ ގައުމީ ދުވަސް ފާހަގަކުރުމަށް ދަރުބާރުގޭގައި ބޭއްވި ހަފްލާގައި ރައީސް މުއިއްޒުގެ އިތުރުން ވަޒީރުންނާއި، ދައުލަތުގެ މުއައްސަސާތަކުގެ އިސްވެރިންނާއި މަޖިލީސް މެންބަރުން ވަނީ ބައިވެރިވެވަޑައިގެންފަ އެވެ.
ޗައިނާގެ ޤައުމީ ދުވަސް ފާހަގަކުރަނީ 1949 ވަނަ އަހަރު ޕީޕަލްސް ރިޕަބްލިކް އޮފް ޗައިނާ އުފެދުނު ދުވަހުން ފެށިގެންނެވެ.