އިޒްރޭލުން އެއްގަމުން ލުބްނާނަށް އަރައިގެންފި އެވެ.
އިޒްރޭލު އަސްކަރިއްޔާ އިން ބުނީ ލުބްނާނުގެ ދެކުނުގެ ސަރަހައްދުތަކުގައި އެއްގަމު މަގުން ހާއްސަ އޮޕަރޭޝަނެއް ފަށާފައިވާ ކަމަށާއި މިއީ ހިޒްބުﷲ ޖަމާއަތުގެ ސަރަހައްދުތަކަށް އަމާޒުކޮށް ހިންގާ އޮޕަރޭޝަނެއް ކަމަށެވެ.
އެއްގަމު މަގުން ހިންގާ މި އޮޕަރޭޝަނުގައި ބައިވެރިވާ ސިފައިންނަށް އެހީވުމުގެ ގޮތުން ވައިގެ އުޅަނދުތައް ވެސް ހަރަކާތްތެރިވާނެ ކަމަށް އިޒްރޭލުން ބުނެ އެވެ.
މި އޮޕަރޭޝަން އިޒްރޭލުން ފެށީ އެގައުމުގެ ސެކިއުރިޓީ ކެބިނެޓުން ރޭ އެކަމަށް ހުއްދަ ދިނުމާ ގުޅިގެންނެވެ.
އިޒްރޭލުން ފާއިތުވި ދެ ހަފްތާތެރޭ ލުބްނާނުގެ އެކި ސަރަހައްދުތަކަށް ވައިގެ ވަރުގަދަ ހަމަލާތަކެއް ވަނީ ދީފަ އެވެ. އެގޮތުން މިދިޔަ ހުކުރު ދުވަހު ދިން ވައިގެ ހަމަލާއެއްގައި ހިޒްބުﷲ ގެ ލީޑަރު ހަސަން ނަސްރުﷲ އާއި އެ ޖަމާއަތުގެ ލީޑަރުންތަކެއް ވަނީ އަވަހާރަކޮށްލާފަ އެވެ.
ހިޒްބުﷲ އިން ވަނީ ނަސްރުﷲ އަވަހާރަކޮށްލި ނަމަވެސް ފަލަސްތީނުގެ ގާޒާ އާއި ލުބްނާނުގެ ދިފާއުގައި ދުޝްމަނުންނާއި ކުރިމަތިލުމުގައި އެ ޖަމާއަތް ދެމި އޮންނާނެ ކަމަށް ބުނެފަ އެވެ.
އިޒްރޭލުން ދެމުންދާ ހަމަލާތަކުގައި ލުބްނާނުން މިހާތަނަށް 1،000 އަށް ވުރެ ގިނަ މީހުން މަރުވެފައިވާއިރު، ލުބްނާނުން 100،000 އަށް ވުރެ ގިނަ މީހުން ވަނީ އެގައުމު ދޫކޮށް ސީރިޔާ އަށް ގޮސްފަ އެވެ.
އިޒްރޭލުން ލުބްނާނަށް ދެމުން އަންނަ ހަމަލާތައް ފާއިތުވި ދެ ހަފްތާތެރޭ އިތުރަށް ވަރުގަދަކުރިއިރު، އެގައުމުން އަންނަނީ ފަލަސްތީނުގެ ގާޒާގައި ވެސް ބޮޑު ގަތުލްއާންމެއް ހިންގަމުންނެވެ. އެ ގަތުލްއާންމުގައި މިހާތަނަށް ގާޒާ އިން ވަނީ 41،000 އަށް ވުރެ ގިނަ މީހުން މަރުވެފަ އެވެ.