ޖާގަ ތަނަވަސްކޮށް މުހިއްމު ގިނަ ބަދަލުތަކަކާ އެކީ މާލޭގެ އާ ސަހަރާ އަންނަ ހުކުރު ދުވަހު ހުޅުވަން ނިންމައިފި އެވެ.
މާލެ ސިޓީ ކައުންސިލުން ބުނީ އެތަނުގައި މިހާރު ކުރިއަށް ދަނީ ތަން ހުޅުވުމުގެ އެންމެ ފަހުގެ ތައްޔާރީތައް ކަމަށެވެ. މާލެ ސިޓީ ކައުންސިލުން ވަނީ މި އަހަރުގެ ޖެނުއަރީން ފެށިގެން އާ ސަހަރާގެ ބޮޑެތި މަރާމާތުތަކެއް ފަށައިގެން ކުރިއަށް ގެންގޮސްފަ އެވެ.
އެ މަސައްކަތްތަކަށް ސަހަރާގައި ޖަނާޒާތައް ބޭއްވުން ހުއްޓާލީ މިދިޔަ އަހަރުގެ މެއި މަހުގެ ތެރޭގަ އެވެ. އޭގެ ފަހުން މާލޭގައި މަރުވާ މީހުންގެ ޖަނާޒާތައް ބާއްވަމުން އައިސްފައި ވަނީ ހުޅުމާލޭގަ އެވެ.
އާ ސަހަރާގެ ޖާގަ ތަނަވަސް ކުރަން ކުރި މަސައްކަތުގެ މިސްކިތް ބޮޑުކޮށްފައިވެ އެވެ. އެގޮތުން އާ ސަހަރާ މިސްކިތުގެ މަތީ ބައި ހާއްސަކޮށްފައި ވަނީ އަންހެނުންނަށެވެ.
އާސަހަރާގެ މަސައްކަތަކީ ކައުންސިލްގެ ބަޖެޓުން ހަރަދުކޮށްގެން ކުރިއަށް ގެންދާ މަޝްރޫއެކެވެ. މަޝްރޫއަށް ކަނޑައެޅި ބަޖެޓަކީ 4.9 މިލިއަން ރުފިޔާ އެވެ. ނަމަވެސް އާސަހަރާގެ ކަންކަން ނިންމުމަށް 9.7 މިލިއަން ރުފިޔާ ހޭދަވި ކަމަށް މޭޔަރު އާދަމް ވިދާޅުވެފައި އެވެ.
އޭނަ ވިދާޅުވީ އަންނަ ހުކުރު ދުވަހު އާ ސަހަރާ ހުޅުުވައި ބޭނުން ކުރަން ފެށުމުން ޖަނާޒާގެ ކަންތައްތަކަށް ބޮޑު ފަސޭހައަކާއި ލުއެއް ލިބިގެން ދާނެ ކަމަށެވެ.