ތަޢުލީމީ ނިޒާމު ހަރުދަނާކޮށް ކިޔަވައި ދިނުމުގެ ފެންވަރު ރަނގަޅު ކުރުމަށްޓަކައި ޓީޗަރުންގެ ދުޅަހެޔޮ ކަމަށް އިސްކަން ދޭން ޖެހޭ ކަމަށް، ފަސްޓްލޭޑީ ސާޖިދާ މުހައްމަދު ވިދާޅުވެއްޖެ އެވެ.
މާލޭގެ ސީއެޗްއެސްއީގައި މިއަދު ފެށި "7 ވަނަ އިންޓަނޭޝަނަލް ޓީޗާސް ކޮންފަރެންސް" ފެށުމުގެ ރަސްމިއްޔާތުގައި އެ ކަމަނާ ވިދާޅުވީ ސަރުކާރުގެ ސިޔާސަތުގެ ތެރެއިން މަސައްކަތުގެ ވަގުތު ކުޑަކޮށް އިދާރީ ގޮތުން ޓީޗަރުން ކުރަން ޖެހޭ މަސައްކަތް ކުޑަކުރުމުން ކިޔަވައިދިނުމުގެ ފެންވަރު ރަނގަޅުވެގެން ދާނެ ކަމަށެވެ.
ސާޖިދާ ވިދާޅުވީ ދަރިވަރުން ތަރުބިއްޔަތު ކުރުމުގައި ޓީޗަރުންނަކީ އަބަދު ވެސް ވަރަށް ބުރަކޮށް، ބޮޑު ޒިންމާއެއް އަދާކުރާ ބައެއް ކަމަށާއި އެ ޒިންމާ އެންމެ ފުރިހަމަ އަށް ނެގުމަށްޓަކައި ޓީޗަރުންނަކީ ހުރިހާ ގޮތަކުން ވެސް ފުދުންތެރި ބަޔަކަށް ވާން ޖެހޭ ކަމަށެވެ. އެގޮތުން ޓީޗަރުންގެ އުފެއްދުންތެރިކަން ރަނގަޅު ކުރުމަށްޓަކައި ޓީޗަރުންގެ ދުޅަހެޔޮ ކަމަކީ ވަރަށް ބޮޑަށް ފޯކަސް ކުރަން ޖެހޭ ދާއިރާއެއް ކަމަށް ވިދާޅުވި އެވެ.
ސާޖިދާ ވިދާޅުވީ ތައުލީމީ ދާއިރާ އަށް ޓެކްނޮލޮޖީ ގެނައުމަކީ މިހާރު މުހިއްމުވެފައި އޮތް ކަމެއް ކަމަށާއި ރާއްޖެ ކަހަލަ ޖަރީޒާ ގައުމަތަކަށް އެކަމުގެ މުހިއްމުކަން ވަރަޑް ބޮޑު ކަމަށެވެ.
"ދިވެހި ރާއްޖެއަކީ ޖަޒީރާ ރައްތަކެއް މައްޗަށް އެކުލެވޭ ޤައުމަކަށްވެފައި، ރަށްތަށް ކުދި އާބާދީތަކަށް ބެހިފައި އޮތުމުން ތައުލީމީ ނިޒާމުގެ ޑިޖިޓަލައިޒްކުރުމަކީ އެއްވެސް ކުށްޖެއް ބާކީ ނުކުރާ ނިޒާމެއް ބިނާކުރުމަށް މުހިންމު ކަމެއް،" ފަސްޓްލޭޑީ ވިދާޅުވި އެވެ. "މިއީ ތަޢުލީމު ދިނުމުގެ ފެންވަރު މަތިކޮށް، ހުރިހާ ތަޢޫލީމު ފޯރުކޮށް ދެވޭކަން ޔަގީން ކުރެވޭނެ ހުރިހާ ކުދިންނަށް އޭގެ ފައިދާ ވާނެ ކަމެއް."
ސާޖިދާ ވިދާޅުވީ ތައުލީމީ ދާއިރާގައި ހުރި ގޮންޖެހުންތައް ގޮންޖެހުންތައް ހައްލު ކުރުމަށްޓަކައި ދިރާސާތައް ކުރެވި އެ ދިރާސާތަކުގެ އަލީގައި ޚާއްސަ ފިޔަވަޅުތަކެއް ވެސް އަޅަން ޖެހޭ ކަމަށެވެ.
މިއަދާއި މާދަމާ އަށް ކުރިއަށް ގެންދާ މި އަހަރުގެ ޓީޗާސް ކޮންފަރެންސްގައި ރާއްޖެ އާއި ރާއްޖެ އިން ބޭރުގެ 248 ފަރާތަކުން ބައިވެރިވެ އެވެ. މި އަހަރުގެ ކޮންފަރެންސްއަށް ތީމަކީ "Educate، Empower, Elevate: Equitable Education for 21st Century Excellence" އެވެ.
ޓީޗާސް ކޮންފަރެންސަކީ ޓީޗަރުންނާއި ތަޢުލީމީ ދާއިރާގައި މަސައްކަތް ކުރާ ފަންނީ މުއައްޒަފުންގެ މެދުގައި ދިރާސާ ކުރުމުގެ ސަގާފަތެއް ޤާއިމު ކުރުމުގެ މަޤްޞަދުގައި ކޮންމެ ދެ އަހަރުން އެއް އަހަރު ބާއްވަމުން އަންނަ ކޮންފަރެންސެކެވެ.