ބޮލީވުޑްގެ މަޝްހޫރު ފިލްމީ ތަރި ރަންބީރް ކަޕޫރް ވެސް އަމިއްލަ ބްރޭންޑެއް ލޯންޗްކޮށްފި އެވެ.
މިދިޔަ މަހުގެ 28 ގައި ފާހަގަކުރި އޭނަގެ 42 ވަނަ އުފަން ދިމާކޮށް ލޯންޗްކުރީ ލައިފްސްޓައިލާއި ކްލޯތިން ބްރޭންޑެކެވެ. މީގެ ނަމަކީ "އޭއާރްކޭއެސް" އެވެ. ނަމަވެސް މި ބްރޭންޑާ ގުޅޭ އިތުރު ތަފުސީލުތަކެއް ހާމައެއް ނުކުރެ އެވެ. އެކަމަކު މީގެ އިންސްޓަގްރާމް ޕޭޖް އާންމުކޮށްފައިވެ އެވެ.
"އޭއާރްކޭއެސް" ދަށުން އަންނާނީ ފެޝަނުގެ އުފެއްދުންތަކަކާ އަކީ އިތުރު ކޮން ކަހަލަ އުފެއްދުންތަކެއް ކަމެއް އަދި ސާފެއް ނުވެ އެވެ.
"އޭއާރްކޭއެސް" ގެ ޓީމުން ބުނެފައި ވަނީ ބްރޭންޑްގެ މަސައްކަތް އޮތީ "ޕްރޮގްރެސް" މަރުހަލާގައި ކަމަށެވެ.
ބޮލީވުޑްގެ މިހާރުގެ އެންމެ ކާމިޔާބު އެކްޓަރުންގެ ތެރޭގައި ހިމެނޭ ރަންބީރް އަމިއްލަ ބްރޭންޑެއް ލޯންޗްކުރި އިރު، އޭނަގެ އަންހެނުން މަޝްހޫރު ބަތަލާ އާލިއާ ބަޓަކީ ވެސް އަމިއްލަ ބްރޭންޑަކާއި އަމިއްލަ ފިލްމު ޕްރޮޑަކްޝަން ހައުސްއެއްގެ ވެރިއެކެވެ. އާލިއާގެ ބްރޭންޑަކީ "އެޑް-އަ-މަމާ" އެވެ. އޭނަގެ ފިލްމު ކުންފުންޏަކީ އިޓާނަލް ސަންޝައިން އެވެ.
އެތަނުގެ ތިން ވަނަ ފިިލްމަކީ މި މަހުގެ 11 ގައި ރިލީޒްކުރާ އެކްޝަން ތުރިލާ "ޖިގްރާ" އެވެ.