މާފުށި ޖަލުގެ ގައިދީންނަށް ފޯނާއި މަސްތުވާތަކެއްޗާއި އެހެނިހެން ސާމާނު ފޯރުކޮށް ދެމުން ދިޔަކަމުގެ ތުހުމަތުގައި ދައުވާކޮށްފައިވާ ފަސް މީހުންގެ ތެރެއިން ތިން މީހަކާ އެކީގައި އިއުތިރާފުގެ އެއްބަސްވުމެއް ހަދައިފި އެވެ.
ކުށުގެ އިއުތިރާފުގެ އެއްބަސްވުން ހެދީ އެ މައްސަލާގައި ދައުވާކޮށްފައިވާ ހދ. ނޭކުރެންދޫ، ތަރާނާގެ، އަލީ ނާޒިމް އާއި ގއ. ވިލިނގިލި، ކުއްޅަވައްގެ، މުހައްމަދު ފަތޫހު ފަތުހުﷲ ގެ އިތުރުން ނ. ލަންދޫ، ކާމިނީގެ، އަލީ އަސްފާގު އާ އެކުގަ އެވެ.
އެ ތިން މީހުންނަށް ދައުލަތުން ކުރަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާއާއި ނުހައްގު މުއްސަނދިކަން ހޯދައި ލިބިގަތުމު ކުށުގެ ދައުވާ އެވެ.
އެ މައްސަލަ ބައްލަވަނީ ގާޒީ އިސްމާއިލް ޝަފީއު އެވެ.
އެ މައްސަލައިގައި ދެން ދައުވާ ލިބޭ ދެ އޮޮފިސަރުންނާ އެކީ އަދި ކުށުގެ އިއުތިރާފު އެއްބަސްވުމެއް ނަހަދަ އެވެެ.
ނާޒިމާއި އަސްފާގުގެ ވަކީލު ޝަޒީމް ވަހީދު ވިދާޅުވީ ބޭނުންވާ ލިއެކިއުންތައް ހަމަވުމުން ދިރާސާކުރުމަށް ފަހު، ތަހުގީގު މަރުހަލާގައި ހެދިފައިވާ އެއްބަސްވުމާ މެދު ގޮތެއް ނިންމަވާނެ ކަމަށެެވެ.
ފައިސާގެ ބޭނުމައި ގައިދީންނަށް ތަކެތި ފޯރުކޮށް ދިން މައްސަލައާއި ގުޅިގެން އޮގަސްޓް 10ގައި 13 އޮފިސަރަކު ހައްޔަރުކުރި އެވެ. އޭގެ ތެރެއިން ފަސް މީހެއްގެ މައްޗަށް ދައުވާ އުފުލާފައިވާއިރު ބާކީ ތިބި އަށް މީހުންނަށް ބޭނުންވާ ވަރަށް ހެކި ނެތުމުގެ ސަބަބުން ދައުވާ ނުކުރުމަށް ޕީޖީން ވަނީ ނިންމައިފަ އެވެ.
މި މައްސަލައިގެ ތަހުގީގުން އެނގޭ ގޮތުގައި އޮފިސަރުންގެ އެކައުންޓަށް މިދިޔަ އަހަރު އެކަނި ވެސް 73.3 މިލިއަން ރުފިޔާ ޖަމާކޮށްފައިވެ އެވެ. އަދި އެއް އޮފިސަރެއްގެ އެކައުންޓަށް އަހަރެއް ތެރޭގައި 24 މިލިއަން ރުފިޔާ ޖަމާކޮށްފައިވެ އެވެ.