މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހުޅުމާލޭގައި ހަދަން ނިންމާފައިވާ 10 ބުރީގެ ކޯޕަރޭޓް އޮފީސް އިމާރާތް ތަރައްގީކޮށް ދޭން ޝައުގުވެރިވާ ފަރާތްތަކަށް އެކްސްޕްރެޝަން އޮފް އިންޓަރެސްޓް (އީއޯއައި) ހުށަހެޅުމުގެ ފުރުސަތު އަލުން ހުޅުވާލައިފި އެވެ.
އެ ކުންފުނިން އެ ފުރުސަތު ފުރަތަމަ ހުޅުވައިލީ ޖޫން މަހުގެ ކުރީކޮޅު އެވެ. އެގޮތުން އޭރު އީއޯއައި ހުށަހަޅަން ދިން މުއްދަތު ހަމަވީ ޖޫން 12 އަށެވެ. އަލުން ހުޅުވާލި ފުރުސަތުގައި އީއޯއައި ހުށަހަޅަން ޖެހެނީ މި މަހުގެ 10 ގެ ކުރިންނެވެ.
އެމްޕީއެލްގެ ހުޅުމާލޭގެ އިމާރާތް އަޅަން ހަމަޖެހިފައި ވަނީ 9،580 އަކަފޫޓުގެ ސަރަހައްދެއްގަ އެވެ. އެ އިމާރާތުގައި ކޮންފަރެންސްތަކާއި އިވެންޓްތައް ބޭއްވުމަށް ހާއްސަ ފްލޯއަކާއި ކެފޭ/ރެސްޓޯރެންޓްތަކަށް ހާއްސަ ފްލޯއެއްގެ އިތުރުން ވިޔަފާރިތަކަށް ހާއްސަ ފްލޯތައް ހުންނާނެ އެވެ. އަދި ދިރިއުޅުމަށް ހާއްސަ ދެ ފްލޯއެއް ވެސް ހިމެނޭނެ އެވެ.
ހަމަމިއާ އެކީ އެމްޕީއެލްގެ އިދާރީ މަސައްކަތަށް ހާއްސަ އޮފީސް އޭރިއާގެ އިތުރުން ކުއްޔަށް ދޫކުރުމަށް ވެސް އޮފީސް ޖާގަ އެ އިމާރާތުގެ ހަ ފްލޯއެއް ހާއްސަ ކުރާނެ އެވެ.
ކޯޕަރޭޓް އޮފީސް އިމާރަތަކީ 112-116 މިލިއަނާ ދެމެދުގެ ބަޖެޓަކުން ކުރިއަށް ގެންދަން ހަމަޖެހިފައިވާ މަޝްރޫއެކެވެ.