އެއްވެސް ފަރާތަކުން ނުފޫޒު ފޯރުވައިގެން ނިންމުމެއް ބަދަލުކުރަން މަޖުބޫރު ކުރުވާ ހިސާބުން މަގާމުން އިސްތިއުފާ ދެއްވާނެ ކަމަށް ޕްރޮސެކިއުޓާ ޖެނެރަލް އައްބާސް ޝަރީފް ވިދާޅުވެއްޖެ އެވެ.
ޕީޖީ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި އައްބާސް ވިދާޅުވީ އެއްވެސް ބޭފުޅަކަށް އޭނާގެ މައްޗަށް ނުފޫޒެއް އަދި ބިރެއް ވެސް ނުދެއްކޭނެ ކަމުގެ 100 ޕަސެންޓް ޔަގީންކަން އެބައޮތް ކަމަށާއި އެފަދަ ކަމެއް ކުރަން އުޅެފިނަމަ މަގާމުން އިސްތިއުފާ ދޭން ފަސްޖެހިވަޑައިނުގަންނަވާނެ ކަމަށެވެ.
"އެއްވެސް ބޭފުޅަކު ނޫނީ އެއްވެސް މުއައްސަސާއަކުން އަޅުގަނޑަށް ނުފޫޒު ފޯރުވައިގެން، އަޅުގަނޑު ލައްވާ ނިންމުމެއް ބަދަލުކުރަން އަޅުގަނޑަށް މަޖުބޫރު ކުރާ ހިސާބަކީ އަޅުގަނޑު މި ގޮނޑިން ތެދުވާނެ ހިސާބު. އަޅުގަނޑު ޖެހިލުމެއް ނުވާނެ މާދަމާ ވެސް އިސްތިއުފާ ދީފައި ނިކުންނަން ޖެހިއްޖެއްޔާ ނިކުންނާނަން،" އައްބާސް ވިދާޅުވި އެވެ.
އައްބާސް ވިދާޅުވީ ގާނޫނުގައި އޮތް މިނިވަންކަމުގައި މަސައްކަތް ކުރެވޭހާ ދުވަހަކު މަގާމުގައި ހުންނަވައިގެން މަސައްކަތް ކުރައްވާނެ ކަމަށާއި ނަމަވެސް އެ މިނިވަންކަން ނެތް ކަމަށް އެނގޭ ދުވަހު މަގާމުން ދުރަށް ވަޑައިގަންނަވަން ޖެހިލުން ނުވާނެ ކަމަށެވެ. މީގެކުރިން ޕީޖީގެ މަގާމު ފުރުއްވި ބޭފުޅުން ވެސް މަސައްކަތް ކުރެއްވީ އެގޮތަށް ކަމަށް ގަބޫލުކުރައްވާ ކަމަށާއި އޭނާ ވެސް މަސައްކަތް ކުރައްވާނީ އެގޮތަށް ކަމަށް ވިދާޅުވި އެވެ.
"ނުފޫޒެއް އިރާދަކުރެވިއްޔާ އެއްވެސް މީހަކަށް އަޅުގަނޑުގެ މައްޗަށް ނުފޯރުވޭނެ. ބިރެއް ވެސް ނުދެއްކޭނެ. އަޅުގަނޑު ޑިސިޝަންތައް ނަގާނީ ބަލަންވާ ވަރަށް ބަލާފައި އަޅުގަނޑު ގަބޫލުކުރާ ގޮތަށް،" އޭނާ ވިދާޅުވި އެވެ.