އޮލިމްޕަހުގައި މިހާރު ދައްކަމުން އަންނަ ކުޑަކުދިންނަށް ހާއްސަ ފިލްމު "ރޮބޯމޭން: ދަ މޫވީ" އަތޮޅު ތެރެއިން އަޅުވާ ފުރަތަމަ ރަށަކަށް ލ. ފޮނަދޫ ވެއްޖެ އެވެ.
އެ ރަށުގައި މި ފިލްމު އަޅުވަން ހަމަޖެހިފައި ވަނީ ބުރާސްފަތި ދުވަހުގެ ރޭގަ އެވެ. އަދި ހުކުރު ދުވަހުގެ ރޭ ވެސް "ރޮބޯމޭން: ދަ މޫވީ" ގެ ޝޯއެއް ފޮނަދޫގައި ދައްކާނެ އެވެ.
މި ފިލްމު އަޅުވަން މިހާރު ތާވަލުކޮށްފައިވާ ރަށްރަށުގެ ތެރޭގައި ރ. އިނގުރައިދު އާއި ކ. މާފުށި ވެސް ހިމެނެ އެވެ.
"ރޮބޯމޭން: ދަ މޫވީ" ގެ ޓީމުން ވަނީ ފިލްމު އަޅުވަން ޝައުގުވެރިވާ ހުރިހާ ރަށަކަށް ވެސް އެ ފުރުސަތު ހުޅުވާލައިފަ އެވެ. އެގޮތުން ޝޯތައް އެޅުވުމުގެ އިންތިޒާމުތައް ހަމަޖައްސަން ގުޅަން ޖެހެނީ 7777968 އަށެވެ.
މިދިޔަ މަހުގެ 26 ގައި އޮލިމްޕަހުގައި ޕްރީމިއާކުރި "ރޮބޯމޭން: ދަ މޫވީ" ގެ ޝޯތައް ހުކުރު ދުވަހާ ހަމައަށް އެ އެ ސިނަމާގައި ކުރިއަށް ގެންދަން ނިންމާފައިވާ އިރު، ހުރިހާ ޝޯތަކެއް ވެސް ވަނީ ފުލްވެފަ އެވެ. މި ފިލްމު ޕްރީމިއާކުރި ފަހުން ކޮންމެ ދުވަހަކު އަންނަނީ ދެ ޝޯ ދައްކަމުންނެވެ.
ރާއްޖޭގެ ކުޑަކުދިންގެ މެދުގައި މަގުބޫލު ކެރެކްޓާއެެއް ކަމަށްވާ ރޮބޯމޭން ހިމަނައިގެން އަދި ނެށުމުގެ މުބާރާތެއް ކާމިޔާބުކުރަން ކުޑަ ދެ އަންހެން ކުއްޖަލު ކުރާ ބުރަ މަސައްކަތްތަކެއް ދައްކުވައިދޭ "ރޮބޯމޭން: ދަ މޫވީ" އަކީ މަހުދީ އަހުމަދުގެ ސްކްރީންޕްލޭއަކަށް އިބްރާހީމް ވިސާން (ކަނޑި) ޑައިރެކްޓްކުރި ފިލްމެކެވެ.
ގިނަ އާ މޫނިތަކެއް ވެސް ފެނިގެންދާ ފިލްމުގެ ކާސްޓްގައި މަޝްހޫރު ތަރިން ކަމަށްވާ މަރިޔަމް އައްޒަ އާއި ރަވީ ފާރޫގް ވެސް ހިމެނެ އެވެ.