އިންޑިއާގެ ފިލްމީ ތަރިން ރާއްޖެ އައުން "ހުއްޓިފައި" އޮންނަތާ ގިނަ ދުވަސްތަކެއް ފަހުން، ފިލްމީ ތަރިން ޗުއްޓީ އަށް ރާއްޖެ އަންނަ ވަރު އިތުރުވާން ފަށައިފި އެވެ.
އެގޮތުން މިހާރު އިންޑިއާގެ މަޝްހޫރު ފިލްމީ ތަރިންގެ އިތުރަށް މަޝްހޫރު ޓީވީ ތަރިން ވެސް ރާއްޖެ އަށް ވަރަށް ގިނައިން ޒިޔާރަތް ކުރަމުން އަންނަކަން ފާހަގަކުރެވެ އެވެ. ބައެއް ތަރިން ރާއްޖެ އަންނަނީ އުފަން ދުވަސް ފާހަގަކުރާށެވެ. އަދި ބައެއް ތަރިން އެ މީހުންގެ ވެޑިން އެނިސާވަރީ އާއި އެ ނޫން ވެސް އެކި ކަހަލަ ހާއްސަ ދުވަސްތައް ފާހަގަ ކުރަން ރާއްޖެ އާދެ އެވެ.
އިންޑިއާގެ ފިލްމީ ތަރިންނަކީ، ހާއްސަކޮށް ބޮލީވުޑްގެ ތަރިންނަކީ ސޯޝަލް މީޑިއާ ޕްލެޓްފޯމްތަކުގައި ވަރަށް ގިނަ އަދަދަކަށް ފޮލޯވަރުން ތިބޭ ބަޔަކަށްވާތީ އެ މީހުން ރާއްޖެ އައިސް ނަގާ ފޮޓޯ/ވީޑިއޯތައް ޕޯސްޓްކުރުމުން ރާއްޖެ ވަރަށް ބޮޑަށް އިޝްތިހާރުވެ އެވެ.
އެހެންވެ އިންޑިއާ މާކެޓްވެފައި ވަނީ ރާއްޖެ އަށް ހަމަ ވަރަށް ވެސް މުހިއްމު މާކެޓަކަށެވެ.
ނަމަވެސް މި އަހަރު ފެށުނު ތަނާހެން ދެ ގައުމުގެ މެދުގައި ޖެހުނު ކުނިތަކެއްގެ ސަބަބުން ރާއްޖެ ބޮއިކޮޓްކުރަން އިންޑިއާ މީހުން ސޯޝަލް މީޑިއާގައި ވަރަށް ގަދައަށް ކެމްޕޭންކުރި އިރު، އެކަމަށް ވާގި ދިނުމުގައި މަޝްހޫރު ގިނަ ތަރިންތަކެއް ވެސް ހަރަކާތްތެރިވި އެެވެ. އޭގެ ތެރޭގައި ރާއްޖެ އަށް އެތައް ފަހަރެއްގެ މަތިން އައިސްފައިވާ ތަރިން ވެސް ހިމެނެ އެވެ.
އިންޑިއާ އަކީ މިދިޔަ އަހަރު ރާއްޖެ އަށް އެންމެ ގިނަ ޓޫރިސްޓުން އައި ގައުމެވެ. އެކަމަކު ދެ ގައުމުގެ މެދުގައި ޖެހުނު ކުންފުންޏާ އެކީ އިންޑިއާގެ ޓޫރިސްޓުން ވަރަށް ބޮޑަށް މަދުވި އެވެ. ހާއްސަކޮށް ފިލްމީ ތަރިން އައުން އެއްކޮށް ކަހަލަ ގޮތަކަށް ހުއްޓުނެވެ. މިކަމެއް ދިމާވީ ސަރުކާރުގެ ޑެޕިއުޓީ މިނިސްޓަރުންތަކެއް އިންޑިއާގެ ބޮޑުވަޒީރު ނަރެންދުރަ މޯދީ އާއި އެ ގައުމަށް ކުޑައިމީސްކޮށް ސޯޝަލް މީޑިއާގައި ފުރައްސާރަކުރުމާ ގުޅިގެންނެވެ.
މިކަމާ ގުޅިގެން މީގެ ރައްދު އައި ރާއްޖޭގެ ޓޫރިޒަމް އިންޑިއާ ބޮއިޓްކުރުމުގެ ޝިއާރުތަކާ އެކީގަ އެވެ. އެގޮތުން ރާއްޖެ ދިއުމުގެ ބަދަލުގައި އިންޑިއާގެ ލަކްޝަދީޕަށް އިންޑިއާ މީހުން ޗުއްޓީ ހޭދަކުރަން ދިއުން މާ އައުލާކަން ބޮޑު ކަމަށް ބުނެ، އެތަން ޕްރޮމޯޓްކޮށް، ރާއްޖެ ބޮއިކޮޓް ކުރަން ގޮވަމުން ދިޔަ އެވެ.
މިކަމުގެ ތެރޭގައި ބައެއް ތަރިން ރާއްޖެ އަށް ދެން ދުވަހަކު ނުދާނެ ކަމަށް ވެސް ބުނެފައިވެ އެވެ. އަނެއްކޮޅުން މި މައްސަލަގަނޑު ފެންމަތިވި ފަހުން އިންޑިއާގެ ބަޔަކު ރާއްޖެ އަށް ޗުއްޓީ އަށް ގޮސް ފޮޓޯތައް ނަގައި، ސޯޝަލް މީޑިއާގައި ޕޯސްޓްކޮށްފި ނަމަ އެ މީހަކަށް އިންޑިއާ މީހުން ވަރަށް އެއްޗެހި ވެސް ގޮވާފައިވެ އެވެ.
ނަަމަވެސް މަޑުމަޑުން މަންޒަރު އަންނަނީ ބަދަލުވަމުންނެވެ. ފާއުތުވި ހަތަރު ފަސް ވަރަކަށް ފަސް މަހުގެ ތެރޭގައި ރާއްޖެ އަންނަ އިންޑިއާގެ ތަރިން އަންނަނީ އިތުރުވަމުންނެވެ. ކުރިން ޖެހުނު ކުނީގެ މަތިން ހަނދާން ނައްތާލަނީ ކަމަށް ވެދާނެ އެވެ.
އަނެއްކޮޅުން އިންޑިއާގައު ރާއްޖެ ޕްރޮމޯޓް ކުރަން ދާދި ފަހުން އެ ގައުމުގެ ބޮޑެތި ބައެއް ސިޓީތަކުގައި ރޯޑްޝޯތަކެއް ވެސް ވަނީ ބާއްވައިފަ އެވެ. ރާއްޖޭގެ ޓޫރިޒަމް މިނިސްޓަރު އިބްރާހީމް ފައިސަލް ވެސް ވިދާޅުވީ އިންޑިއާ މާކެޓް ވަރަށް މުހިއްމު ކަމަށާއި އިންޑިއާ އިން އަންނަ ޓޫރިސްޓުން އިތުރު ކުރަން ކުރިއަށް އޮތް ތަނުުގައި ގިނަ މަސައްކަތްތަކެއް ކުރާނެ ކަމަށެވެ.
ޔަގީނުން ވެސް މިއީ ރާއްޖޭގެ ޓޫރިޒަމަށް ލިބޭ އިތުރު ދިރުމަކަށް ވާނެ އެވެ. އިންޑިއާ މިހާރު އޮތީ ރާއްޖެ އަށް އެންމެ ގިނަ ޓޫރިސްޓުން އަންނަ ގަދަ 10 ގެ ލިސްޓްގެ ހަ ވަނައިގަ އެވެ. މިދިޔަ މަހުގެ 28 އާ ހަމައަށް އެ ގައުމުން 90،000 އާ ގާތްކުރާ އަދަދަކަށް ޓޫރިސްޓުން އައިސްފައިވެ އެވެ.