ކެމިކަލް ގެންގުޅޭ ފަރާތްތަކުން ގަވާއިދާ އެއްގޮތަށް އަމަލު ކުރޭތޯ ބަލަން ހާއްސަ އޮޕަރޭޝަނެއް ޑިފެންސް މިނިސްޓްރީން ފަށައިފި އެވެ.
ޑިފެންސް މިނިސްޓްރީން ބުނީ ނުރައްކާތެރި ކެމިކަލާބެހޭ ގަވާއިދުގައި ބަޔާންކޮށްފައިވާ މިންގަނޑަށް ކެމިކަލް ރައްކާކުރާ ތަންތަނާއި ވިޔަފާރިކުރާތަންތަން ހުރިތޯ ބެލުމާއި މި ގަވާއިދަށް އާއްމުރައްޔިތުން ހޭލުންތެރިކުރުވުމަށް ހިންގާ "އޮޕަރޭޝަން ހިރާސް ފާސް" މިއަދު ފަށައިފައިވާ ކަމަށެވެ.
މި މަހުގެ 15 ގެ ނިޔަލަށް ކުރިއަށްގެންދިއުމަށް ހަމަޖެހިފައިވާ މި އޮޕަރޭޝަންގައި ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން ހިންގަނީ ގަވާއިދާ އެއްގޮތަށްތޯ ބެލުމުގެ އިތުރުން، ގްރޭޓަރ މާލެ އޭރިއާގައި ފަސޭހައިން އަލިފާންރޯވާ ފަދަ ތަންތަނާއި އެ ތަންތަނުގައި ހުރި ހިރާސްތައް ވެސް މި އޮޕަރޭޝަންގެ ތެރެއިން ދެނެގަންނާނެ ކަމަށް މިނިސްޓްރީން ބުނެ އެވެ.
ރާއްޖެއަށް އެކި ބޭނުންތަކުގައި އެތެރެ ކުރެވޭ ނުރައްކާތެރި ކެމިކަލްތައް އެތެރެ ކުރުމުގެ ހުއްދަ ދިނުމާއި، އެފަދަ ކެމިކަލްތައް ގުދަންކޮށް ރައްކާ ކުރުމަކީ އެ މިނިސްޓްރީން ރެގިއުލޭޓްކުރާ ކަމެއް ކަމަށާއި އެފަދަ ކެމިކަލްތަކަށް ހުއްދަ ދެނީ ގާނޫނީ އިމުގެ ތެރެއިން ނަމަވެސް އެތަކެތި ގެންގުޅުމުގައި ބައެއް ފަރާތްތަކުން ގަވައިދާ ޚިލާފުވާ ކަމުގެ ޝަކުވާތައް މިނިސްޓްރީން ބުނެ އެވެ.
އަދި މިކަމަކީ ގަވައިދުތަކާއި އެއްގޮތްވާ ގޮތުގެ މަތިން މުތުލަގަށް ތަންފީޒު ނުކުރެވިއްޖެ ނަމަ އިއާދަ ނުކުރެވޭ ފަދަ ގެއްލުންތަކަކަށް ދިވެހި ރައްޔިތުން ހުށަހެޅިގެން ދިޔުމަށް ހުޅުވޭ ދޮރެއް ކަމަށްވެސް މިނިސްޓްރީން ބުނެ އެވެ.