ހދ. އަތޮޅުގެ ދަނޑުވެރިންނަށް ހާއްސަކޮށްގެން ހިންގި ތަމްރީނު ޕްރޮގްރާމް ނިންމާލައި ބައިވެރިންނަށް ސެޓްފިކެޓް ދީފި އެެވެ.
އެ އަތޮޅުގެ އެކި ރަށްތަކުން 13 ދަނޑުވެރިންނާ ހަފުތާއެއްގެ މުއްދަތަށް ކުރިއަށް ގެންދިޔަ މި ތަމްރީނު ޕްރޮގްރާމަކީ ހދ. އަތޮޅު ކައުންސިލުގެ އިސްނެގުމާ އެކީ އެގްރިކަލް މިނިސްޓްރީގެ މެދުވެރިވެގެން ހިންގި ޕްރިގްރާމެކެވެ.
ހަނިމާދޫ އެގްރިކަލްޗަ ސެންޓަރުގައި ކުރިއަށް ގެންދިޔަ މި ތަމްރީނު ޕްރޮގްރާމަކީ އިންޓަނޭޝަނަލް ފަންޑް ފޮ އެގްރިކަލްޗަރަލް ޑިވެލޮޕްމަންޓް (އިފާޑް) ގެ އެހީތެރިކަމާއެކު ކުރިއަށް ގެންދިޔަ ޕްރޮގްރާމެކެވެ.
ތަމްރީނު ޕްރޮގްރާމް ފުރިހަމަކުރި ބައިވެރިންނަށް ސެޓްފިކެޓް ދެއްވީ މިނިސްޓްރީގެ ފަރާތުން ރަސްމިއްޔާތު ޝަރަފުވެރިކޮށް ދެއްވި މިނިސްޓްރީގެ ޑެޕިއުޓީ މިނިސްޓަރު އަހުމަދު ފަޔާޒެވެ.
އެ ތަމްރީނު ޕްރޮގްރާމުގައި ދަނޑުވެރިންނަށް މައިގަނޑު ގޮތެއްގައި ދަސްކޮށް ދިނީ ޒަމާނީ ދަނޑުވެރިކަމުގެ އާ ޓެކްނިކްތަކާއި، ގަސްކާނާ ބޭނުންކުރުމުގެ ހަރުދަނާ ގޮތްތަކާއި، ބަލިތަކުން ގަސް ސަލާމަތްކުރުމުގެ ގޮތްތަކެވެ.