ދިވެހި ސްކްރީނަށް އަލަށް އެކީގައި އަންނަން ތައްޔާރުވަމުން އަންނަ ޖޯޑު ކަމަށްވާ މަރިޔަމް މަޖުދާ (މަޖޫ) އާއި ޝަރަފު އަބްދުﷲ ދެވަނަ ފިލްމަކަށް ސޮއިކޮށްފި އެވެ.
މި ދެ ތަރިން ސޮއިކުރި އާ ފިލްމަކީ އެ މީހުންގެ ކެމިސްޓްރީ ބެލުންތެރިންނަށް އަލަށް ދައްކައިލަން މި މަހު ގެނެސްދޭ "ބިބީ" ވެސް އުފެއްދި ޑާކް ރެއިން އެންޓަޓައިންމަންޓް ފިލްމެކެވެ. ރަސްމީކޮށް އަދި ނަން އިއުލާން ނުކުރާ މި ފިލްމަކީ އެ ސްޓޫޑިއޯގެ 40 ވަނަ ޕްރޮޖެކްޓެވެ.
މީގެ ސްކްރިޕްޓް ނެރޭޝަނާއި ރިހާސަލްތަކެއް މިހާރު ފަށާފައިވާ އިރު، ފިލްމުގެ ޑައިރެކްޓަރަކީ ޑާކް ރެއިންގެ ގިނަ އުފެއްދުތަންތައް ޑައިރެކްޓްކުރި އަލީ ޝިފާއު (ޗިއްޕެ) އެވެ. އޭނަގެ އާ ފިލްމުގެ ކާސްޓްގައި މަޖޫ އާއި ޝަރަފާ އެކީ އަންހެނުން އައިޝަތު ޔާދާ ވެސް ހިމެނެ އެވެ.
އަންނަ އަހަރުގެ ކުރީކޮޅު ޝޫޓިން ފަށަން ޕްލޭންކޮށްފައިވާ "ޕްރޮޖެކްޓް 40" ގެ ސްކްރީންޕްލޭ ލިޔުނީ ޕްރޮޑިއުސަރު މުހައްމަދު އަލީ (މޮގާ) ގެ އަންހެނުން އައިޝަތު ފުއާދު ތައުފީގު (ލޯކީ) އެވެ.
މި ފިލްމަކީ ޑާކް ރެއިނަށް މިދިޔަ މަހުގެ 14 ގައި 18 އަހަރު ފުރުމާ ދިމާކޮށް އިއުލާންކުރި ޕްރޮޖެކްޓަތަކުގެ ތެރޭގައި ހިމެނޭ އެކައްޗެވެ. އަދި ފިލްމު އަންނަ އަހަރު ބެލުންތެރިންނަށް ގެނެސްދޭނެ އެވެ.
ޗިއްޕެ އާ ޕްރޮޖެކްޓަކަށް ތައްޔާރީތައްވާން ފެށި އިރު، އޭނަ އެންމެ ފަހުން ޑައިރެކްޓްކޮށް ގެނެސްދިން ފިލްމަކީ މި އަހަރުގެ މާޗް މަހުގެ ތެރޭގައި އެޅުވި ރިވެންޖް އެކްޝަން ތުރިލާ "ފުރޭތަ" އެވެ. އަދި ޑާކް ރެއިނުން ދާދި ފަހުން ޝޫޓިން ފެށި "ޕްރޮޖެކްޓް 37" އަކީ ޗިއްޕެ އާއި އެކްޓަރު ރަވީ ފާރޫގް ގުޅިގެން ޑައިރެކްޓްކުރާ ފިލްމެކެވެ.
ރަސްމީކޮށް އަދި ނަން އިއުލާން ނުކުރާ މި އެކްޝަން ތުރިލާ ވެސް އަންނަ އަހަދު ގެނެސްދޭނެ އެވެ.
ޑާކް ރެއިނުން މި މަހުގެ 7 ގައި ޕްރީމިއާކުރަން ތައްޔާރުވަމުން އަންނަ "ބިބީ" އަކީ އެ ސްޓޫޑިއޯގެ ފުރަތަމަ ހޮރޯ-ކޮމެޑީ އެވެ. މިއީ އާ ޑައިރެކްޓަރު ޝަހުދާ މަހުމޫދުގެ އަލަތު ފީޗާ އެވެ.