ދަތި ހާލުގައި ނިކަމެތި އާއިލާތަކަށް އެހީވާން ރާއްޖޭގެ ޖަމިއްޔާއެއް ކަމަށްވާ "މަމްސް އެއިޑް" އަނެއްކާ ވެސް އިތުރު އާއިލާއަކަށް ހިތްގައިމު ބޯހިޔާވަހިކަމަކާ އެކީ އުފާވެރިކަން ގެނެސް ދީފި އެވެ.
މި ފަހަރު މި ނަސީބު ލިބުނު މީހަކީ އދ. މާމިގިއްޔަށް ނިސްބަތްވާ އައިމިނަތު އަލީ އެވެ. ތިން ކުދިންގެ މައެކެވެ. އެކަނިވެރި މައެކެވެ. އައިމިނަތާއި ކުދިން މިހާތަނަށް އުޅެމުން އައީ ވަރަށް ދަތި، އުނދަގޫ ހިތްދަތި ދިރިއުޅުމެކެވެ. ނަމަވެސް މި އާއިލާ އަށް "މަމްސް އެއިޑް" މިހާރު ވަނީ އާ އުންމީދުތަކާއި ހަޔާތެއް ހޯދައި ދީފަ އެވެ.
ހިތްގައިމު ރީތި ގެއަކާ އެކީ އެ އާއިލާގެ މެންބަރުންގެ މޫނުތަކަށް މިއަދު ވަނީ އުފާވެރިކަމާއި ތާޒާކަން ގެނުވައި ދީފަ އެވެ.
މި މަސައްކަތާ ގުޅޭ ގޮތުން "މަމްސް އެއިޑް" އިން ބުނީ މިއަދު އެންމެ އުފާވަނީ އާމިނަތާއި އޭނާގެ ތިން ދަރިންނަށް ރައްކާތެރި މާޙައުލެއް ޤާއިމްކޮށް ދެވި، ޢާއިލާއަށް ބޯހިޔާވަހި ކަމެއް ހޯދައިދެވިފައިވާތީ ކަމަށެވެ.
"އަދި ކުދިންގެ ފާގަތި މުސްތަގުބަލަކަށް މަގުފަހިކޮށް ދެވުނީތީ." މަމްސް އެއިޑުން ބުންޏެވެ.
އެ ޖަމިއްޔާ އިން ބުނީ މުޅިން އަލަށް އިމާރާތްކުރި ގެއަކި އާމިނަތާއި އޭނަގެ ދަރިންނަށް މިހާރު އަމިއްލަ ކޮޓަރީގައި އަރާމު ތަންމަތިތަކެއްގައި ނިދުމުގެ ފުރުސަތު ފަހިވެގެން ގޮސްފައިވާ ކަމަށެވެ.
"އާމިނަތާއި އޭނާގެ ތިން ދަރިންގެ ދިރިއުޅުމުގެ ޙާލަތު މިފަދަ ހެޔޮ ގޮތަކަށް ބަދަލުކުރެވިގެން ދިޔައީ ގިނަ ބޭފުޅުންގެ ދީލަތި އެހީތެރިކަމާއި އެއްބާރުލުމާ އެކީ." މަމްސް އެއިޑުން ބުންޏެވެ.
"މަމްސް އެއިޑް" އިން ބުނީ އުންމީދަކީ ކުރިއަށް އޮތްތަނުގައިވެސް މިފަދަ ޢާއިލާތަކަށް އެހީތެރިކަން ފޯރުކޮށް ދިނުމުގައި ދެމިއޮތުން ކަމަށެވެ. މީގެ ކުރިން ވެސް އެ ޖަމިއްޔާ އިން އެތައް އާއިލާއެއްގެ ހާލަތު ބަދަލުކޮށްދީ އުފާވެރިކަމާއި އުންމީދުތައް އާކޮށް ދީފައިވެ އެވެ.