ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ މިނިސްޓްރީގެ ޓީމެއް އައްޑު އަށް ފޮނުވަން ހަމަޖެހިފައިވާ ކަމަށް މިނިސްޓަރު އާދަމް ޝަރީފު އުމަރު ވިދާޅުވެއްޖެ އެވެ.
އައްޑޫގެ ކައުންސިލަރުންތަކެއް މާލެ ވަޑައިގެން އެކިއެކި އިދާރާތަކާ ބައްދަލު ކުރުން މި ހަފުތާގެ ތެރޭގައި ކުރިއަށް ގެންދިޔަ އިރު، އެ ޓީމު، އިދާރީ ދާއިރާތަކާ ބެހޭ މިނިސްޓްރީއާ އެކީ ބޭއްވި ބައްދަލުވުމުގައި ކުރެވުނު މަޝްވަރާތަކަކާ ގުޅިގެން މިނިސްޓަރު ސޯޝަލް މީޑިއާ ޕޯސްޓެއްގައި ވިދާޅުވީ އަންނަ ހަފުތާގެ ތެރޭގައި މިނިސްޓްރީގެ ޓީމެއް އައްޑު އަށް ފޮނުވާނެ ކަމަށެވެ.
މިނިސްޓަރު ވިދާޅުވީ އެ ޓީމް އައްޑު އަށް ކުރާ ދަތުރުގައި އެ ސިޓީގެ ޕަބްލިކް ވޯކްސް އިން ދެމުން އަންނަ ހިދުމަތްތައް މިހާރަށް ވުރެ ރަނގަޅުކުރުމަށްޓަކައި ކުރެވެން ހުރި ކަންތައްތައް ދެނެގަންނާނެ ކަމަށެވެ. އާދަމް ޝަރީފު ވިދާޅުވީ އައްޑު އަށް ފޮނުވާ ޓިމްގައި މިނިސްޓްރީގެ ސިޔާސީ ބޭފުޅުންތަކަކާއި ސިވިލް ސާވިސްގެ މުވައްޒަފުންތަކެއް ވެސް ހިމެނޭނެ ކަމަށެވެ.
އިދާރީ ދާއިރާތަކާ ބެހޭ މިނިސްޓްރީން ބުނީ ޕަބްލިކް ވޯކްސްގެ ޚިދުމަތްތައް މުޅި ރާއްޖެއަށް ދިނުމަށްޓަކައި ގިނަ މަސައްކަތްތަކެއް ސަރުކާރުން ކުރަމުން އަންނަ ކަމަށއެވެ. އަދި އެ ހިދުމަތް ވީހާ ވެސް ބޮޑަށް ފުޅާކުރުމަކީ މި ސަރުކާރުގެ މުހިންމު އެއް ސިޔާސަތު ކަމަށެވެ.
އައްޑޫ ކައުންސިލުން މާލެ އަށް ކުރި ދަތުރުގައި އެންމެ އިސްކޮށް ހުންނެވީ މޭޔަރު އަލީ ނިޒާރެވެ.