ކުއްލިއަކަށް ލިބުނު ބޮޑު މަޝްހޫރުކަމާ ގުޅިގެން މިނިވަންކަން ގެއްލި އެކަމުގެ އުނދަގުލާ މިހާރު ކުރިމަތިލާން ޖެހިފައިވާ ކަމަށް ބޮލީވުޑްގެ ޒުވާން ބަތަލާ ޓްރިޕްތީ ދިމްރީ ބުނެފި އެވެ.
މިދިޔަ އަހަރު ރިލީޒްކުރި ރަންބީރް ކަޕޫރްގެ "އެނިމަލް" ގައި ކުޅުނު "ބޯލްޑް" ރޯލުގެ ސަބަބުން 30 އަހަރުގެ ބަތަލާ އަށް ގިނަ ބައެއްގެ ސަމާލުކަން ހުއްޓި، ބޮލީވުޑުން އަންނަނީ އޮފާތައް ވެސް އޮހެމުންނެވެ. ޓްރިޕްތީ މިހާރު ފާހަގަކޮށްލެވެނީ އެންމެ ބިޒީ އެއް ބަތަލާގެ ގޮތުގަ އެވެ.
ޖުލައިގައި ރިލީޒްކުރި ކާމިޔާބު ފިލްމު "ބޭޑް ނިއުސް" އަށް ފަހު، އޭނަ މިހާރު އަންނަނީ ރިލީޒްކުރުމުގެ މަގުމަތީގައި އޮތް އިތުރު ދެ ފިލްމެއް ޕްރޮމޯޓް ވެސް ކުރަމުންނެވެ. އެއީ މި މަހުގެ 11 ގައި ގެނެސްދޭ "ވިކީ ވިދިއާ ކާ ވޯ ވާލާ ވީޑިއޯ" އާއި ނޮވެމްބަރު 1 ގައި ގެނެސްދޭ "ބޫލް ބުލައްޔާ 3" އެވެ.
މީޑިއާއަކަށް ދިން އިންޓަވިއުއެއްގައި ޓްރިޕްތީ ބުނީ އޭނަ އަށް ލިބުނު ބޮޑު މަޝްހޫރުކަމާ ގުޅިގެން، ކުރީގެ ދިރިއުޅުން މިހާރު އެއްކޮށް ބަދަލުވެފައިވާ ކަމަށެވެ. އެގޮތުން އަމިއްލަ މިނިވަންކަމާއި ޕްރައިވެސީ އެއްކޮށް ގެއްލިފައިވާ ކަމަށް ބުންޏެވެ.
"އަހަންނަކީ ކުރިން އަބަދު ވެސް ރައްޓެހިންނާ އެކީ ބޭރަށް ގޮސް ވަރަށް މަޖާ ވެސް ކުރާ މީހެއް. އެގޮތުން ބޭރު ތެރޭގައި ވަރަށް މިނިވަންކަމާ އެކީ ރައްޓެހިންނާ އެކީ ތަންތަނަށް ގޮސް ކެއުމާއި އެ ނޫން ވެސް ކަންކަން ކުރަމުން އައި މީހެއް އަހަންނަކީ،" ޓްރިޕްތީ ބުންޏެވެ. "އެކަމަކު މިހާރު އެކަން ކުރެވޭކަށް ނެތް. އަމިއްލަ މިނިވަންކަމާއި ޕްރައިވެސީ އެއްކޮށް ގެއްލިއްޖެ. ކުރިން އުޅުނު ގޮތަށް ކަންކަމާ ދޭތެރޭ މާ ބޮޑު ފިކުުރެއް ނެތި މީހާރު ބޭރު ތެރޭގައި އެއްވެސް ވަރަކަށް އުޅެވޭކަށް ނެތް."
އޭނަ ބުނީ މިހާރު އާންމުންގެ ސަމާލުކަން ދާ ކޮންމެ ތާކުން ލިބޭތީ އުޅެން ޖެހެނީ ވަރަށް ވިސްނައިގެން ފަރުވާތެރިކަމާ އެކީގައި ކަމަށެވެ. އެހެންވެ މިއީ އެހާ ފަސޭހަ ކަމެއް ނޫން ކަމަށް ބާރަށް ކުރިއަރަމުން އަންނަ އުންމީދީ ބަތަލާ ބުންޏެވެ. ޓްރިޕްތީ ބުނީ އަދި މަސައްކަތްތަކުގައި ވަރަށް ބުރަކޮށް މިހާރު އުޅެން ޖެހޭތީ ޖިސްމާނީ ގޮތުންނާއި ނަފުސާނީ ގޮތުން ކުރިމަތިވާ ކަންކަމާ ކުރިމަތިލާން އަމިއްލަ އަށް ވަގުތު ހޯދުން ވެސް އުނދަގޫ ކަމަކަށްވެފައިވާ ކަމަށެވެ.
"އެހެންވެ މިހާރު މަސައްކަތްތަކުން ކިރިޔާ ޗުއްޓީ އަށް ލިބޭ އިރަށް އަހަރެން ބޭނުންވޭ އުފަން ސްޓޭޓް އުތުރާކަންދަށް ގޮސް އެތަނުގެ ހިތްގައިމު މާހައުލުގެ ތެރޭގައި އުޅެލަން." ޓްރިޕްތީ ބުންޏެވެ.
އޭނަގެ ކުރިއަށް ހުރި އިތުރު ޕްރޮޖެކްޓްތަކުގެ ތެރޭގައި "ދަޅަކް 2" އާއި ޝާހިދު ކަޕޫރާ އެކީ ކުޅެން ހަމަޖެހިފައިވާ ފިލްމަކާއި މަދޫރީ ޑިކްސިޓާ އެކީ ކުޅެން ލިބިފައިވާ ފިލްމަކާއި "ބޫލް ބުލައްޔާ 2" ގެ އެކްޓަރު ކާތިކް އާރިއަންއާ އެކީ ކުޅޭ ޑައިރެކްޓަރު އަނޫރާގް ބާސޫގެ ފިލްމެއް ހިމެނެ އެވެ.
ރިޕޯޓްތައް ބުނާ ގޮތުން ތަމަޅަ އެކްޓަރު ދަނޫޝްއާ އެކީ ޑައިރެކްޓަރު އާނަންދު އެލް ރާއީ ހަދަން ނިންމާފައިވާ "ތެރެ އިޝްގް މޭ" ގެ ބަތަލާ އަކީ ވެސް ޓްރިޕްތީ އެވެ.