ޕޮލިސް ކޮމިޝަނަރު ޢަލީ ޝުޖާއު ހއ. އަތޮޅަށް ރަސްމީ ދަތުރުފުޅެއް ފައްޓަވައިފި އެވެ.
ސީޕީގެ ޑެޕިއުޓީ ކޮމިޝަނަރު ފަރުހާދު ފިކުރީ އާއި އެސިސްޓެންޓް ކޮމިޝަނަރުން ކަމަށްވާ އަހުމަދު މުޙައްމަދާއި އަބްދުﷲ ޝަރީފުގެ އިތުރުން ފުލުހުންގެ އެގްޒެކެޓިވް ބައެއް އޮފިސަރުންނާއި ކޮމިޝަންޑު އޮފިސަރުން ބައިވެރިވެވަޑައިގަނެ އެވެ.
ސީޕީގެ ހއ. އަތޮޅު ދަތުރުގައި އަތޮޅު ކައުންސިލާއި ރަށު ކައުންސިލުތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތައް އަދި އެ ރަށްރަށުގައި މަސައްކަތްކުރާ ފުލުހުންނާ ވެސް ބައްދަލު ކުރައްވާނެ އެވެ. އެ ބައްދަލުވުންތަކުގައި، ރަށްރަށުގެ ކުށުގެ ހާލަތު ބައްލަވައި ރައްޔިތުންގެ ހުރި ކަންބޮޑުވުންތައް ދެނެގަނެ އެކަންކަން ހައްލުކުރުމަށް ފުލުހުންނާ ގުޅިގެން ކުރެވެން ހުރި ކަންކަމާ މެދު މަޝްވަރާކުރައްވާނެ އެވެ.
އަދި ކުށް މަދުކޮށް ރައްޔިތުންގެ ސަލާމަތާއި ރައްކާތެރިކަމަށް މަސައްކަތްކު ރުމަށާއި ރައްޔިތުންނާ ގުޅިގެން މަސައްކަތް ކުރުމަށް ވެސް މަޝްވަރާ ކުރައްވާނެ އެވެ.
މިއީ މިއަދުން ފެށިގެން މި މަހު 7 އަށް ކުރިއަށް ގެންދާ ދަތުރެކެވެ. ދަތުރުގެ ތެރޭގައި ދިއްދޫ، ކެލާ، އުތީމު، ބާރަށް، ފިއްލަދޫ، ތަކަންދޫ، މާރަންދޫ، ހޯރަފުށި، ތުރާކުނު، އުލިގަން އަދި އިހަވަންދުއަށް ސީޕީގެ ޓީމު ވަޑައިގަންނަވާނެ އެވެ.
މަގާމާ ހަވާލުވެވަޑައިގަތް ފަހުން ސީޕީ ބައެއް އެހެން އަތޮޅުތަކަށް ވެސް ވަޑައިގެންފައިވެ އެވެ.