ކާމިޔާބު އެތައް ފިލްމެއް ކުޅެފައިވާ އިނގިރޭސިވިލާތަށް އުފަން ހޮލީވުޑްގެ ކުޅަދާނަ ތަރި ޑެނިއަލް ޑޭ-ލުވިސް އެކްޓިން ރަސްމީކޮށް ރިޓަޔާކޮށްފި އެވެ.
މިހާރު އުމުރުން 67 އަހަރުގެ އެކްޓަރު އެކްޓްކުރުން ހުއްޓައިލީ އޭނަގެ ދަރިއެއް ކަމަށްވާ ރޮނާން ޑޭ-ލުވިސްގެ އަލަތު ޑައިރެކްޝަން "އެނެމަން" ގެ މަސައްކަތް ނިންމުމަށް ފަހު އެވެ. މިހާރު ޕޯސްޓް ޕްރޮޑަކްޝަން މަރުހަލާގައި އޮތް މި ފިލްމު ރިލީޒްކުރާނެ ތާރީހެއް އަދި އިއުލާނެއް ނުކުރެ އެވެ.
ދަރިފުޅާ އެކީ ސްކްރީން ޕްލޭގައި ވެސް ޑެނިއަލް ހިއްސާވެފައިވާ "އެނެމަން" އަކީ އެކްޓިންއާ ދުރުގައި ހުންނަތާ 7 އަހަރު ފަހުން އޭނަ ކުޅުނު ފުރަތަމަ ފިލްމެވެ. ޑެނިއަލްގެ އެންމެ ފަހުގެ ފިލްމަކީ 2017 ގެ ރޮމޭންޓިކް ޕީރިއަޑް ޑްރާމާ "ފޭންޓަމް ތުރެޑް" އެވެ.
ތިން އޮސްކާ އެވޯޑާއި ދެ ގޯލްޑެން ގްލޯބް އެވޯޑް ވެސް ހޯދާފައިވާ އެކްޓަރުގެ ފާހަގަކޮށްލެވޭ ބައެއް ފިލްމުތަކުގެ ތެރޭގައި "މައި ލެފްޓް ފުޓް"، "ލިންކަން"، "އިން ދަ ނޭމް އޮފް ދަ ފާދާ"، "ގޭންގްސް އޮފް ނިއު ޔޯކް"، "ދަ ލާސްޓް އޮފް ދަ މޮހިކަންސް"، "ދި އޭޖް އޮފް އިނޮސެންސް"، "ދަ ކްރޫސިބަލް" އަދި "ދަ ބޮކްސާ" ހިމެނެ އެވެ.
ގިނަ އަދަދެއްގެ ފިލްމުގެ އިތުރުން ވަރަށް ގިނަ ޓީވީ އުފެއްދުންތަކުގައި ވެސް ޑެނިއަލް މަސައްކަތްކޮށްފައިވެ އެވެ. ޑެނިއަލް ހިމެނެނީ އޭނަގެ ޖީލުގެ އެންމެ މޮޅު އެކްޓަރުންގެ ތެރޭގަ އެވެ.