އިންޑިއާގެ މަޝްހޫރު ތަަމަޅަ އެކްޓަރު ވިޖޭގެ އެންމެ ފަހުގެ ފިލްމު ގޯޓް (ގްރޭޓެސްޓް އޮފް އޯލް ޓައިމް) ސިނަމާތަކަށް ގެނައިތާ 28 ދުވަސް ފަހުން މާދަމާ ނެޓްފްލިކްސް އިން ޕްރީމިއާކުރަން ނިންމައިފި އެވެ.
މި ފިލްމު ހިންދީ ބަހުން ވެސް ބަލައިލެވޭނެ އެވެ.
ވިޖޭ ޑަބަލް ރޯލެއް ކުޅެ، މިދިޔަ މަހުގެ 5 ގައި ރިލީޒްކުރި "ގޯޓް" އަކީ ވެންކަޓް ޕްރަބޫ ޑައިރެކްޓްކުރި އެކްޝަން ތުރިލާއެކެވެ. މި ފިލްމަށް ބޮކްސް އޮފީހުގައި 456 ކްރޯޑް ރުޕީސް (54.3 މިލިއަން ޑޮލަރު) ގެ އާމްދަނީއެއް ލިބުނު، ފިލްމު ހެދީ 400 ކްރޯޑް ރުޕީސް (48 މިލިއަން ޑޮލަރު) ގެ ބަޖެޓަކުންނެވެ.
ވިޖޭ، 50، އަކީ އިންޑިއާގެ ތަމަޅަ ފިލްމީ ތަރިންގެ ތެރެއިން އެންމެ ނުފޫޒު ގަދަ އެކެކެވެ. ރިޕޯޓްތައް ބުނާ ގޮތުން އަންނަ އަހަރުގެ ފަހުކޮޅު ރިލީޒްކުރަން ހަމަޖެހިފައިވާ އޭނަގެ 69 ވަނަ ފިލްމާ އެކީ އެކްޓިން ކެރިއަރު ނިންމައިލާނެ އެވެ. އޭގެ ފަހުން ވިޖޭ ހަރަކާތްތެރި ވާނީ ސިޔާސީ ދާއިރާގަ އެވެ.
މި އަހަރުގެ ކުރީކޮޅު އޭނަ ވަނީ އަމިއްލަ ސިޔާސީ ޕާޓީއެއް ވެސް އުފައްދައިފަ އެވެ. އެ ޕާޓީގެ ނަމަކީ ޓަމިލަގާ ވެއްޓްރީ ކަޒަގަމް (ޓީވީކޭ) އެވެ.