މިފްކޯގެ "ރަސް އައިން" ބްރޭންޑަށް ހެދިކާ ތައްޔާރުކޮށް ސަޕްލައިކޮށް ދޭނެ ބަޔަކު ހޯދަން އިއުލާނުކޮށްފި އެވެ.
ސަރުކާރުގެ މަސް ކުންފުނިން ކުރި އިއުލާނެއްގައި ބުނީ އެ ކުންފުނީގެ ސީއެސްއާރުގެ ދަށުން ކުރިއަށް ގެންދާ "ރަސްއައިން" ގެ ބާވަތްތައް ސަޕްލައިކޮށް ދިނުމަށް ޝައުގުވެރިވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުސަތު މި މަހުގެ 7 އާ ހަމައަށް ހުޅުވާލާފައިވާ ކަމަށެވެ.
މިކަމާ ބެހޭ އިތުރު މައުލޫމާތު މި ނަމްބަރު 3323932 އިން ހޯދޭނެ އެވެ.
މިފްކޯ އިން ބުނީ "ރަސްއައިން" ބްރޭންޑަށް ހެދިކާ ސަޕްލައިކޮށް ދޭން އާންމުކޮށް ހުޅުވައިލުމުގެ ބޭނުމަކީ މަހުގެ ބާވަތްތައް އުފައްދާ ކުދި ވިޔަފާރިތަކަށް އިތުރު ފުރުސަތުތައް ހޯދައި ދިނުމާއި، އެ ފަރާތްތަކުގެ ވިޔަފާރި ފުޅާކުރުމަށް އެހީތެރިވުން ކަމަށެވެ.
އެގޮތުން "ރަސްއައިން" ޕްރޮޑަކްޓްގެ ތެރޭގައި ހިމެނެނީ މަހުން އުފައްދާ، އަގު އެއްކުރެވިފައިވާ ދިވެހި ކާނާގެ ބާވަތްތަކެވެ. އޭގެ ތެރޭގައި އަތުޖެހި، ހަނޑުލު ގުޅަ، ކުޅި ކާޖާ އަދި ތެލުލި ބަޖިޔާ ފަދަ ބާވަތްތައް ހިމެނެ އެވެ. މީގެ އިތުރުން ވެސް މިފްކޯގެ މަހުގެ ބާވަތްތައް ބޭނުންކޮށްގެން ގިނަ ދުވަހަށް ތާޒާކަން މަތީ ބެހެއްޓޭނެ ކާބޯތަކެތި ތައްޔާރު ކުރެވޭނެ ކަމަށް އެ ކުންފުނިން ބުންޏެވެ.