ސިނާއީ ބޭނުމަށް ހުޅުމާލޭގެ ދެވަނަ ފިޔަވަހިން ބީލަމުގެ އުސޫލުން 12 ބިން ވިއްކަން ހުޅުވާލައިފި އެވެ.
ހައުސިން ޑިވެލޮމަންޓް ކޯޕަރޭޝަން (އެޗްޑީސީ) އިން ބުނީ ވިއްކަން ހުޅުވައިލީ 3،746 އަކަފޫޓުގެ އަށް ބިމަކާއި 3،689 އަކަފޫޓުގެ ހަތަރު ބިމެކެވެ. މި ބިންތަކުގެ ބީލަން ފެށޭ އަގަކީ އަކަފޫޓަކަށް 7،500ރ. އެވެ.
އެޗްޑީސީން ބުނީ ބީލަން ހުށަހަޅަނީ ކުންފުންޏަކުން ނަމަ އެ ކުންފުންޏަކީ ރާއްޖޭގައި ރަޖިސްޓްރީކޮށްފައިވާ 100 ޕަސަންޓް ދިވެހިންގެ ހިއްސާ އޮންނަ ކުންފުންޏަކަސް ވާން ޖެހޭނެ އެވެ.
ބިން ވިއްކުން ކުރިއަށްދާނީ ދެމަރުހަލާއަކަށް ބަހާލައިގެންނެވެ. ފުރަތަމަ މަރުހަލާގައި ކުރިއަށް ދާނީ ޕޯޓަލް މެދުވެރިކޮށް ޝައުގުވެރިވާ ފަރާތްތަކުން ބިމަށް އެކްސްޕްރެޝަން އޮފް އިންޓްރަސްޓް (އީއޯއައި) ހުށަހެޅުމެވެ. ދެވަނަ މަރުހަލާގައި ކުރިއަށް ދާނީ އެއް ފަރާތަށް ވުރެ ގިނަ ފަރާތުން ހުށަހަޅާފައިވާ ބިމަކަށް ބިޑް ކުރުމެވެ.
އެޗްޑީސީން ބުނީ ކޮންމެ ފަރާތަކަ ށްވެސް ތިން ބިން ގަނެވިދާނެ ކަމަށެވެ. ބިން ގަތުމަށް ހުށަހަޅަން ޖެހޭނީ އެޗްޑީސީގެ އޮންލައިން ޕޯޓަލް މެދުވެރިކޮށެވެ.