އިންޑިއާގެ ދެ ސުޕަސްޓާރުން ކަމަށްވާ ރަޖްނީކާންތާއި އަމީތާބް ބައްޗަން ވަރަށް ގިނަ ދުވަސްތަކުން ފަހުން އެކީގައި ކުޅުނު ފުރަތަމަ ފިލްމު "ވެއްޓައިޔަން: ދަ ހަންޓާ" ޓްރެއިލާ ދައްކާލައިފި އެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ މި ތަމަޅަ އެކްޝަން ތުރިލާ އަކީ ޓީޖޭ ގުނަނަވެލް ޑައިރެކްޓްކޮށްފައިވާ ފިލްމެކެވެ. ރަޖްނީކާންތު ލީޑް ރޯލު ކުޅެފައިވާ "ވެއްޓައިޔަން" ގައި އަމީތާބް ފެންނާނީ ސަތިއަދޭވް ކިޔާ ކެރެކްޓާއަކުންނެވެ.
މި މަހުގެ 10 ގައި ސިނަމާތަކަށް ގެންނަން ތާވަލުކޮށްފައިވާ ފިލްމު ހިންދީ ބަހުން ވެސް ޑަބްކޮށްގެން ސިނަމާތަކުގައި ދައްކާނެ އެވެ. "ވެއްޓައިޔަން" ގެ ކާސްޓްގައި ރާނާ ދަގޫބަތީ، ފަހަފު ފާސިލް، މަންޖޫ ވާރިއާ، ރިތިކާ ސިންގް، ރޯހިނީ އަދި ރަމޭޝް ތިލަކް ހިމެނެ އެވެ.
އަމީތާބާއު ރަޖްނީކާންތުގެ ފޭނުން "ވެއްޓައިޔަން" އަށް މިހާރު ވަރަށް ބޮޑަށް އިންތިޒާރު ކުރަމުން އަންނަ މި ދެ ސުޕަސްޓާރުން ކުރިން ވެސް އެކީގައި ވަރަށް ކާމިޔާބު ފިލްމުތަކެއް ކުޅުނެވެ. އޭގެ ތެރޭގައި 1983 ގެ ހިންދީ ފިލްމު "އަންދާ ގާނޫނު" ފާހަގަކޮށްލެވެ އެވެ.