ރައްޔިތަކު ފުލުހުން ކައިރިއަށް ކަމަކު އަތުވެއްޖެ ނަމަ މާޔޫސްކޮށް ނުލުމަށް ޕޮލިސް ކޮމިޝަނަރު ޢަލީ ޝުޖާއު އެދިވަޑައިގެންފި އެވެ.
ހއ. އަތޮޅަށް ސީޕީ މިހާރު ކުރައްވަމުން ގެންދަވާ ދަތުރުގެ ތެރެއިން ދިއްދު އާއި ކެލާ އަދި އުތީމަށް ޒިޔާރަތްކުރައްވައި އެ ރަށްރަށުގެ ފުލުހުންނާ ބައްދަލު ކުރައްވައި ދެއްކެވި ވާހަކައިގައި ވިދާޅުވީ ރައްޔިތުންނާ ބައްދަލުވެ، އެ ފަރާތްތަކުގެ ކަންބޮޑުވުންތައް އޮޅުންފިލުވައި، ރައްޔިތުންނާ ގާތުން ފުލުހުންގެ ޚިދުމަތް ފޯރުކޮށް ދިނުމުމަކީ ފުލުހުން ވަރަށް އިސްކަންދޭން ޖެހޭ ކަމެއް ކަމަށެވެ.
އެހެންވެ އެގޮތަށް ހުރިހާ ފުލުހުން ވެސް މަސައްކަތްކޮށް ދެއްވުމަށް އެދިވަޑައިގަތެވެ.
ސީޕީ ވިދާޅުވީ ރަށްރަށުގެ ތަރައްގީގެ މަސައްކަތްތަކުގައި ފުލުހުންގެ ދައުރު ވެސް ވަރަށް މުހިއްމު ކަމަށާއި ރައްޔިތުންނާ ގުޅުން ހުރި ކަންކަމުގައި ފުލުހުންގެ އެހީތެރިކަމާއި އެއްބާރުލުން އަބަދު ވެސް އޮންނާނެ ކަމަށެވެ.
ސީޕީ ޝުއާޖު އަތޮޅުތަކަށް ކުރައްވާ ދަތުރުގެ މައިގަނޑު މަގުސަދަކީ ރަށްރަށުގެ ކުށުގެ ހާލަތާއި ރައްޔިތުންގެ ކަންބޮޑުވުންތައް ދެނެގަނެ، އެކަންކަން ހައްލުކުރުމަށް ކުރެވިދާނެ މަސައްކަތްތަކާ ގުޅޭ ގޮތުން މަޝްވަރާކުރުމެވެ.