ގިނަ ބަޔަކު އިންތިޒާރު ކުރަމުން އަންނަ ބޮލީވުޑްގެ ފިލްމު "ސިންގަމް އެގެއިން" ގެ ޓްރެއިލާ މި މަހުގެ 7 ގައި އާންމު ކުރާނެ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނީ ޑައިރެކްޓަރު ރޯހިތު ޝެޓީގެ ކޮޕް ޔުނިވާސް އަށް ނިސްބަތްވާ އަދި އަޖޭ ދޭވްގަން ފުުލުހެއްގެ ރޯލުން ފެންނާނެ ފިލްމުގެ ޓްރެއިލާ ލޯންޗްކުރާނީ މުމްބާއީގެ ނީތާ މުކޭޝް އަމްބާނީ ކަލްޗްރަލް ސެންޓަރުގައި ބާއްވާ ވަރަށް ހާއްސަ ކުލަގަދަ އިވެންޓެއްގައި ކަމަށެވެ.
އެ އިިވެންޓްގައި "ސިންގަމް އެގެއިން" ގެ މައިގަނޑު ހުރިހާ ތަރިންތަކެއް ވެސް ބައިވެރިވާނެ ކަމަށް ބޮލީވުޑް ހަންގާމާ އިން ބުންޏެވެ.
ފިލްމުގެ ޓްރެއިލާ ބެލުންތެރިންނަށް ދޫކޮށްލަން ތައްޔާރުވަމުން އަންނަ އިރު، މީގައި ފުލުހެއްގެ ރޯލެއް ކުޅެފައިވާ ބަތަލާ ދީޕިކާ ޕަދްކޯން މި ވަގުތު ހުރީ އަލަތު ދަރިފުޅު ވިހައިގެން ފިލްމީ މަސައްކަތްތަކުން ބްރޭކެއްގަ އެވެ. ނަމަވެސް އޭނަ ވެސް "ސިންގަމް އެގެއިން" ގެ ޓްރެއިލާ ލޯންޗިން އިވެންޓްގައި ބައިވެރިވާނެ ކަމަށް މީޑިއާތަކުން ބުންޏެވެ.
"ސިންގަމް އެގެއިން" ގެ ކާސްޓްގައި ދީޕިކާގެ ފިރިމީހާ މަޝްހޫރު އެކްޓަރު ރަންވީރް ސިންގް ވެސް ހިމެނެ އެވެ. އޭނަ ފިލްމުގައި ފެންނާނީ ކޮޕް ޔުނިވާސްގެ ދެވަނަ ފިލްމު ކަމަށްވާ "ސިމްބާ" ގައި ކުޅުނު ފުލުސް ކެރެކްޓާއަކުންނެވެ. އަދި އަކްޝޭ ކުމާރު ވެސް ފުލުހެއްގެ ގޮތުގައި އޭނަގެ ފުލުސް ކެރެކްޓާ "ސޫރިއަވަންޝީ" ގެ ގޮތުގައި ފެންނާނެ އެެވެ.
"ސިންގަމް އެގެއިން" ގެ ކާސްޓްގައި ކަރީނާ ކަޕޫރް، ޓައިގާ ޝްރޮފް، އަރުޖުން ކަޕޫރް، ޖެކީ ޝްރޮފް، އަޝުތޯޝް ރާނާ އަދި ޝްވޭތާ ތިވާރީ (ޕްރޭނާ) ވެސް ހިމެނެ އެވެ.
އަންނަ މަހުގެ 1 ގައި ސިނަމާތަކަށް ގެންނަން ހަމަޖެހިފައިވާ މި ފިލްމަކީ "ސިންގަމް' ފްރެންޗައިޒްގެ ތިން ވަނަ ބައެވެ. މީގެ އަނެއް ދެ ފިލްމަކީ 2011 ގެ "ސިންގަމް" އާއި 2014" ގެ "ސިންގަމް ރިޓާނސް" އެވެ.