މާލެ ސަރަހައްދުގެ ޕާކިން މައްސަލަތަކަށް ހައްލެއް ހޯދަން ހުޅުމާލޭގައި 4،000 ޕާކިން ޔުނިޓު އެކުލެވޭ ގޮތަށް 15 ޕާލކިން ބިލްޑިން އަޅަން ޓްރާންސްޕޯޓް މިނިސްޓްރީން މިއަދު ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) އާ ހަވާލުކޮށްފި އެވެ.
މިކަމުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރު މުހައްމަދު އަމީނެވެ. އެޗްޑީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރު ފަޒުލް ރަޝީދެވެ.
މިނިސްޓަރު ޕާކިން ޔުނިޓްތަލެއް އަޅަން ނިންމުމަކީ ޕާކިން މައްސަލަކަށް ހައްލެއް ހޯދަން މި ސަރުކާރުން ކުރަން ނިންމި އެންމެ މުހިންމު އެއް ނިންމުން ކަމަށެވެ.
"ގަރާޒުތައް ބޭނުންވާ ފަރާތްތަކަށް ޕާކިން ޔުނިޓުތައް އެޅުނީމަ އެ މައްސަލައަށް ހައްލެއް ލިބޭނެ. ގަރާޖު ހުރިކަމަށް ރެޖިސްޓާކޮށްގެން މާލޭގައި ވަރަށް ގިނަ އުޅަނދު އެބަހުރި،" އަމީން ވިދާޅުވި އެވެ. "އެ އުޅަނދުތައް ވެސް އެކި ތަންތާ ޕާކުކޮށްފަ ހުއްޓާ ނަގާނަމަ އުނދަގޫތަކެއް ވާނެ ވެހިކަލް ގެންގުޅޭ ފަރާތްތަކަށް ވެސް."
މިނިސްޓަރު ވިދާޅުވީ ޕާކިން ބިލްޑިން ޔުނިޓްތައް އަޅައި ނިމުމުންއެ ޕާކިން ބިލްޑިން ގާނޫނުގެ ތެރެއިން ވެހިކަލްތަކެއް ރެޖިސްޓްރީ ކުރެވޭނެ ފުރުސަތު ލިބޭނެ ކަމަށެވެ.
އެޗްޑީސީއާ ހަވާލުކޮށްގެން ހަދާ ޕާކިން ޔުނިޓްތަކުގެ 10 ޕަސެންޓަކީ ވަގުތީ ގޮތުން ޕާކް ކުރަން ދޫކުރާ ޔުނިޓްތަކެވެ. އަދި ބާކީ ހުރި ޔުނިޓްތައް ގަންނަ ފަރާތްތަކަށް ވިއްކައި، އެ ޔުނިޓްތައް ރަޖިސްޓަރީކޮށް ދޭނެ އެވެ.
މި ބިލްޑިން ޔުނިޓްތަގައި އިލެކްޓްރިކް ވެހިކަލް ޗާޖް ވެސް ކުރެވޭނެ އެވެ. އަދި އެތަނުގައި ބޭނުންކުރާ ހަކަތަ އުފެއްދުމަށް ނިންމާފައި ވަނީ އިއާދަކުރެނިވި ހަކަތައިންނެވެ. ބިލްޑިންތަކުގެ ޓެރަސް ވިޔަފާރި ބޭނުންތަކަށް ކުއްޔަށް ވެސް ދެވޭނެ އެވެ. އެގޮތުން ކެފޭ/ރެސްޓޯރެންޓު އަދި ސްޕޯޓްސް އެރީނާތައް ފަދަ ތަންތަން ހިންގަން ޖާގަ ދެވޭނެ އެވެ.
ފަޒުލް ވިދާޅުވީގިނަވެގެން 2-3 އަހަރުގެ ތެރޭގައި ޕާކިން ބިލްޑިންތައް ނިންމާނެ ކަމަށެވެ.