އައްޑޫގައި ހިންގަމުން އަންނަ ޝަންގްރިއްލާ ވިލިނގިލި ރިސޯޓް އެންޑް ސްޕާގައި ޓޫރިސްޓުން ހާއްސަކޮށްގެން ހިންގަމުން އަންނަ ރަން ވިއްކާ ފިހާރަ ފަޅާލި މައްސަލައިގައި، އެރޭ ޑިއުޓީގައި ތިބި ދިވެހި 3 މުވައްޒަފަކު 'ސެކިއުރިޓީ ކެމެރާތަކަށް ނާރާ' ކަމަށް ބުނެ ފުލުހުންގެ ބެލުމުގެ ދަށަށް ގެންގޮސްފިއެވެ.
ކެމެރާތަކަށް ނާރާ' ކަމަށް ބުނެ ދެ މުވައްޒަފަކު ހައްޔަރުކޮށްފައިވާ އިރު އިތުބާރު ހުރި ގޮތެއްގައި 'އައްޑޫލައިވް' އަށް މައުލޫމާތު ލިބިފައިވާ ގޮތުގައި ޝަންގްރިއްލާ ރިސޯޓުގެ ރަންފިހާރައިގެ ކެމެރާތައް ހުރީ މެއިންޓެނެންސް މަސައްކަތްތަކެއް ކުރުމަށް ނިވާލާފައެވެ.
ރިސޯޓުގެ ސެކިއުރިޓީ ކެމެރާތަކުގެ މަސައްކަތަކީ ސެކިއުރިޓީ ޑިޕާޓްމަންޓްގެ މަސައްކަތް ތަކުގެ ތެރޭގައި ހިމެނޭ ކަމަކެވެ.
ޝަންގްރިއްލާ ރިސޯޓުން ވާހަކަދެއްކި މުވައްޒަފަކު ބުނި ގޮތުގައި ރަން ފިހާރައިގެ ކެމެރާތައް ނިވާލާފައި ހުރިކަން އެނގޭނީ ހަމައެކަނި ސެކިއުރިޓީ ޑިޕާޓްމަންޓަށް ކަމަށާއި އެހެންކަމުން އެރޭ ރިސޯޓުގެ ސެކިއުރިޓީ ބެލެހެއްޓި މުވައްޒަފުން ވެސް ހައްޔަރުކުރަން ޖެހޭނެ ކަމަށެވެ.
" ރަން ފިހާރަ ފެޅީ އެއް ނޫން. އެއީ ބޮޑު ރޭވުމެއް. ތަޅުދަނޑި ހުރީ ޖަހާފައި، ކެމެރާ މަސައްކަތް ނުކުރާކަން އެނގޭނީ އެތަނުގައި މަސައްކަތް ކުރާ މުވައްޒަފަށް ނޫނީ ދެން އެނގޭނީ ސެކިއުރިޓީ އަށް." ރިސޯޓުގައި މަސައްކަތް ކުރާ ފޭދޫގެ ޒުވާނަކު ބުންޏެވެ.
ރަން ފިހާރަ ފަޅާލި މައްސަލައިގައި ދިވެހި 3 މުވައްޒަފަކު ހައްޔަރުކޮށްފައިވާއިރު، އެ ފިހާރައިގައި މަސައްކަތް ކުރާ ބިދޭސީ މީހާ އާއި އަދި ސެކިއުރިޓީ އޮފިސަރަކު ވެސް ފުލުހުންގެ ބެލުމުގެ ދަށަށް ގެންގޮސްފައެއް ނުވެއެވެ.
ޝަންގްރިއްލާ އިން ހިންގާ ވިލިނގިލި ރިސޯޓުގެ އިސް މަޤާމުތަކުގައި ގިނައިން ތިބެނީ ބިދޭސީ މީހުން ކަމަށް ވެފައި އަބަދުވެސް ދިވެހިންނާއި މެދު ތަފާތު ގެންގުޅޭ ކަމަށް ޝަންގްރިއްލާގެ ދިވެހި މުވައްޒަފުން އަބަދުވެސް ޝަކުވާކުރެއެވެ.
މީގެ އިތުރުން ރިސޯޓުގައި ހިނގާ ކަމަކާއި ގުޅޭގޮތުން ސޯޝަލް މީޑިޔާގައި ލިޔެފިނަމަ ވަޒީފާއިން ވަކިކުރާނެ ކަމުގެ އިންޒާރުވެސް އެ ރިސޯޓުގެ މުވައްޒަފުންނަށް ދީފައިވާކަމަށް ވެއެވެ.