އިސްލާމީ ޤައުމުތަކުގެ މެދުގައި އުފައްދާފައިވާ ބައިނަލްއަގުވާމީ ޖަމިއްޔާ އެއް ކަމަށްވާ އިސްލާމިކް ވޯލްޑް އެޑިޔުކޭޝަނަލް ސައިންޓިފިކް، އެންޑް ކަލްޗަރަލް އޯގަނައިޒޭޝަން (އިސެސްކޯ) ގެ 3 ވަނަ އެޑިޔުކޭޝަން މިނިސްޓަރުންގެ ބައްދަލުވުމުގައި ރާއްޖޭގެ އެޑިއުކޭޗަން މިނިސްޓަރު ޑރ. އިސްމާޢީލް ޝަފީޢު ބައިވެރިވެވަޑައިގެންފި އެވެ.
އިއްޔެ ފެށި ކޮންފަރެންސް ކުރިއަށް ދަނީ އޮމާން ގެ ވެރިރަށް މަސްކަޓްގަ އެވެ. ކޮންފަރެންސް ކުރިއަށް ދާނީ މިއަދުގެ ނިޔަލަށެވެ.
މި ކޮންފަރެންސްގައި މިނިސްޓަރު ޝަފީއުގެ އިތުރުން ސްޓޭޓް މިނިސްޓަރު ޑރ. އަހުމަދު މުޙައްމަދު ވެސް ބައިވެރިވެ ވަޑައިގަންނަވަ އެވެ.
ޢަރަބި އިސްލާމީ ޤައުމުތަކުގެ އެޑިޔުކޭޝަން މިނިސްޓަރުން ބައިވެރިވާ މި މުހިންމު ކޮންފަރެންސްއަށް މި އަހަރު ކަނޑައަޅާފައިވާ ތީމަކީ "ބިޔޯންޑް ޓްރާންސްފޯމިން އެޑިޔުކޭޝަން ސަމިޓް: ފްރޮމް ކޮމިޓްމަންޓް ޓު އެކްޝަން" އެވެ.
މި ތީމްގެ ދަށުން މިފަހަރު މަޝްވަރާކުރުމަށް ހަމަޖެހިފައި ވަނީ އިސްލާމީ ދުނިޔޭގައި ތަޢުލީމު ދިނުމާ ގުޅޭ ގޮތުންނާއި، ތަޢުލީމު ފޯރުކޮށް ދިނުމުގައި ތިމާވެއްޓާ ރައްޓެހި ގޮތަކަށް ކުރިއަށް ގެންދިއުމާއި، އާޓިފިޝަލް އިންޓެލިޖެންސްގެ ދައުރު އަދި ޑިޖިޓަލް ޓްރާންސްފޮމޭޝަން އޮފް އެޑިޔުކޭޝަނާއި، އެކި ކުއްލި ޙާލަތްތަކުގައި ތަޢުލީމު ފޯރުކޮށް ދިނުމުގެ މައްޗަށެވެ.
މި ކޮންފަރެންސްގެ އަމާޒަކީ ތަޢުލީމު ބަދަލުކުރުމަށް ޤައުމުތަކަށް ބާރުއެޅުމާއި، ޓްރާންސްފޯމިން އެޑިޔުކޭޝަން ސަމިޓުގެ ނިންމުންތައް ތަންފީޒުކުރުމުގައި ޤައުމުތަކުގެ މެދުގައި ގުޅުން ބަދަހިކުރުމެވެ.
މިއަދުގެ ސެޝަންގައި ކޮންފަރެންސްގެ ތީމާ ގުޅޭ ގޮތުން އެކި ޤައުމުތަކުން ސްޓޭޓްމަންޓްތައް ހުށަހެޅުން ކުރިއަށްދާނެ އެވެ. އެގޮތުން ރާއްޖޭގެ ފަރާތުން ސްޓޭޓްމަންޓް ހުށަހަޅުއްވާނީ މިނިސްޓަރެވެ.