ދިވެހިންނަށް މަތީ ތައުލީމުގެ ފުރުސަތުތައް އިތުރުވެފައިމިވަނީ ރައީސް ޑރ. މުހައްމަދު މުޢިއްޒުގެ ތައުލީމަށް ދެއްވާ އިސްކަމުގެ ތެރެއިން އެމަނިކުފާނުގެ މިންނެތް މަސައްކަތްޕުޅުންކަމަށް މަތީތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއިބެހޭ ވަޒީރު ޑރ. މަރްޔަމް މާރިޔާ ވިދާޅުވެއްޖެ އެވެ.
ތުރުކީއިން ރާއްޖެއަށް ފަހިކޮށްދީފައިވާ ސްކޮލަޝިޕްގެ ފުރުސަތުގައި މިހާތަނަށް ހޮވުނު 14 ދަރިވަރުންނަށް ބޭއްވި ޚާއްޞަ ޙަފްލާގައި ވާހަކަދައްކަމުން މާރިޔާ ވިދާޅުވީ ވެރިކަމާ ވަޑައިގަތުމަށް ފަހު، ރައީސް މުއިއްޒު އެންމެ ފުރަތަމަ، ތުރުކީއަށް ކުރެއްވި ރަސްމީ ދަތުރުފުޅުގައި ދިވެހިންނަށް އެކި ދާއިރާތަކުން މަތީތައުލީމް ހާސިލްކުރުމަށް ސްކޮލަރޝިޕްތަކުގެ ފުރުޞަތު ހޯއްދަވައި ދެއްވި ކަމަށެވެ.
"ރާއްޖޭގެ ރިޔާސަތާ ޙަވާލުވެ ވަޑައިގަތުމަށް ފަހު، ރައީސުލްޖުމްހޫރިއްޔާގެ ޙައިޞިއްޔަތުން އެންމެ ފުރަތަމަ، ތުރުކީއަށް ކުރެއްވި ރަސްމީ ދަތުރުފުޅުގައި މި ސްކޮލަރޝިޕްތަކުގެ ފުރުޞަތު ދިވެހި ދަރިވަރުންނަށް ހޯއްދަވައި ދެއްވީ. ތުރުކީ އާއި އަޅުގަނޑުމެންގެ މި ލޮބުވެތި ވަޠަނާއި ދެ ޤައުމުގެ ގުޅުން އިތުރަށް ބަދަހިކުރައްވައި، ދިވެހި ދަރިވަރުންނަށް، ތަޢުލީމީ އިތުރު ފުރުޞަތުތަކަށް މަގުފަހިކޮށްދެއްވީ އެ ދަތުރުފުޅުގައި،" މާރިޔާ ވިދާޅުވި އެވެ.
ރައީސްގެ އިތުރުން، ފޮރިން މިނިސްޓްރީންނާއި، ތުރުކީވިލާތުގައި ޤާއިމުވެ ހުންނަވާ ދިވެހިރާއްޖޭގެ އެމްބެސެޑަރ ލެފްޓިނަންޓް ޖެނެރަލް (ރިޓަޔރޑް) ޢަބްދުއްރަޙީމް ޢަބްދުއްލަޠީފާއި އެމަނިކުފާނުގެ މިޝަންގެ މުވައްޒަފުން، ސްރީލަންކާގައި ހުންނަ، ތުރުކީވިލާތުގެ އެމްބަސީ، ތުރުކީގެ ހަޔަރ އެޑިޔުކޭޝަން ކައުންސިލް، އަދި އެ ޤައުމުގެ މިނިސްޓްރީ އޮފް ކަލްޗަރ އެންޑް ޓޫރިޒަމާއި، ރާއްޖޭގެ ހަޔާ އެޑިއުކޭޝަން މިނިސްޓްރީގެ މަސައްކަތްތައް މިނިސްޓަރު މާރިޔާ ފާހަގަކުރެއްވި އެވެ.
ދިވެހިންނަށް ކުރިޔަށްދެވޭނެ ފުރުސަތުތައް ފުޅާކުރުމުގެ ގޮތުން ޙާއްސަ ފަންނުތަކުން ދިވެހީންނަށް ކުރިޔަށް ދެވޭނެ އިންތިޒާމް ހަމަޖައްސައި ޤައުމީ ތަރައްޤީގައި ދިވެހިން ޝާމިލްވުމުގެ ފުރުސަތު ފަހިކޮށްދެއްވުމަކީ ރައީސް މުއިއްޒުގެ ވައުދުފުޅެކެވެ.