ބޮލީވުޑްގެ ފިލްމު "ބޯޑާ 2" އަށް އެ ފިލްމުގެ ފުރަތަމަ ބައިގެ މުހިއްމު ރޯލެއް ކުޅުނު އެކްޓަރު ސުނިލް ޝެޓީގެ ދަރިފުޅު އަހާން ޝެޓީ ވެސް ސޮއިކޮށްފި އެވެ.
ހިންދީ ސިނަމާގެ އެންމެ ކާމިޔާބު ހަނގުރާމަ ފިލްމުތަކުގެ ތެރޭގައި ހިމެނޭ 1997 ގެ "ބޯޑާ" ގެ ދެވަނަ ބަޔަށް ކުރިން ސޮއިކުރި އެކްޓަރުންގެ ތެރޭގައި ފުރަތަމަ ބައިގެ ކާސްޓުންގެ ތެރެއިން ދެވަނަ ބައިގައި ހިމެނޭ ހަމައެކަނި އެކްޓަރު ކަމަށްވާ ސަނީ ޑިއޯލްގެ އިތުރުން ވަރޫން ދަަވަނާއި ދިލްޖީތު ދޮސަންޖް ހިމެނެ އެވެ.
"ބޯޑާ 2" ގެ ޓީމުން މިއަދު ވަނީ ކާސްޓަށް އަހާން ވެސް އިތުރުވެފައިވާކަން އިއުލާންކޮށްފަ އެވެ.
މިކަމާ ގުޅިގެން 29 އަހަރުގެ އެކްޓަރު ބުނީ ބައްޕަ ކުޅުނު ފިލްމެއްގެ ދެވަނަ ބައިގައި ހިއްސާވާން ލިބުމަކީ ވަރަށް ބޮޑު ޝަރަފެއް ކަމަށާއި ބައްޕަގެ ލެގަސީއަށްޓަކައި ވެސް "ބޯޑާ 2" އަށް ވަރަށް ފުރިހަމަ މަސައްކަތް ކުރާނެ ކަމަށެވެ. އަހާން ބުނީ ސުނިލް "ބޯޑާ" ކުޅުނު ދުވަސްވަރު މަންމަ މާނާ ޝެޓީ އިނީ އޭނަ އަށް ބަލިވެ ކަމަށެވެ.
"ފިލްމުގެ ޝޫޓިން ކުރިއަށް ދިޔަ ދުވަސްވަރު މަންމަ ދާނެ ބައްޕައާ ބައްދަލު ކުރަން ސެޓަށް ވެސް. އޭރު އަހަންނަށް މަންމަ އިނީ ބަލިވެ." ބޯޑާ އިން ފުރުސަތު ލިބުމުން އަހާން ބުންޏެވެ.
އޭނަ ބޮލީވުޑަށް ނުކުތީ 2020 ގެ "ތަޅަޕް" އިންނެވެ. އޭގެ ފަހުން އިތުރު އެއްވެސް ފިލްމަކުން އަހާން ފެނިފައެއް ނުވެ އެވެ. ނަމަވެސް މި އަހަރުގެ މެދުތެރޭގައި "ތަޅަޕް" ގެ ޕްރޮޑިއުސަރު ސާޖިދު ނަދިއަދުވާލާގެ އިތުރު ފިލްމަކަށް އަހާން ސޮއިކުރި އެވެ. އެއީ "ސާންކީ" އެވެ. ކާސްޓްގައި ޕޫޖާ ހެގްޅޭ ހިމެނޭ އެ ފިލްމު އިއުލާންކުރި ފަހަކުން އޭގެ އެއްވެސް އަޕްޑޭޓެއް ދީފައެއް ނުވެ އެވެ.
ރިޕޯޓްތައް ބުނާ ގޮތުން "ބޯޑާ 2" ގެ ޝޫޓިން އަންނަ މަހުގެ ތެރޭގައި ފެށުމުގެ ތައްޔާރީތައް އަންނަނީ ވަމުންނެވެ. މީގެ ޑައިރެކްޓަރަކީ އަކްޝޭ ކުމާރުގެ 2019 ގެ "ކޭސަރީ" ގެނެސްދިން އަނޫރާގް ސިންގް އެވެ. ޖެނުއަރީ 23، 2026 ގައި ގެނެސްދޭން ހަމަޖެހިފައިވާ ފިލްމު އުފައްދަނީ ފުރަތަމައިގެ ޑައިރެކްޓަރު ޖޭޕީ ދައްތާގެ ފިލްމު ކުންފުންޏާއި ބުޝަން ކުމާރުގެ ޓީ ސީރީޒް ގުޅިގެންނެވެ.
"ބޯޑާ" އަކީ އިންޑިއާ އާއި ޕާކިސްތާނުން 1971 ގައި ކުރި ލޮނގެވާލާ ހަނގުރާ އަށް ބިނާކޮށް ގެނެސްދިން ވަރަށް ކާމިޔާބު ފިލްމެކެވެ. އެ ފިލްމުގެ ކާސްޓްގައި ސަނީ އާއި ސުނިލްގެ އިތުރުން، އަކްޝޭ ކަންނާ، ޖެކީ ޝްރޮފް، ޕޫޖާ ބަޓް، ތައްބޫ، ރާކީ، ޕުނީތު އިސާރު އަދި ސުދޭޝް ބެރީ ފަދަ ތަރިން ހިމެނެ އެވެ.