ދާދި ފަހުން ރިލީޒްކޮށް، ހިންދީ ސނަމާގެ ބޮކްސް އޮފީހުގައި އާ ރެކޯޑްތަކެއް ހެދި "އިސްތިރީ 2" ގެ ޑައިރެކްޓަރު އަމަރް ކޯޝިކްގެ ފިލްމެއް ޝާހްރުކް ޚާނަށް ހުށަހަޅައިފި އެވެ.
ޕިންކްވިލާ އިން ބުނީ އެ ދެ މީހުން އެކީގައި މަސައްކަތް ކުރަން ހުރި ފުރުސަތުތަކާ ބެހޭ ގޮތުން މިހާރު މަޝްވަރާތައް ކުރިއަށްދާ ކަމަށެވެ. ނަމަވެސް ޝާހްރުކާ އަކީ އަމަރު ހަދަން ބޭނުން ވަނީ ކޮން ކަހަލަ ފިލްމެއްކަމާއި މިއަށް ޝާހްރުކް ފެހި ސިގްނަލް ދިންކަން އަދި ޔަގީން ނުވާ ކަމަށް މީޑިއާތަކުން ބުނެ އެވެ.
"އިސްތިރީ 2" ގެ ބޮޑު ކާމިޔާބީއާ ގުޅިގެން އަމަރުއާ އެކީ މަސައްކަތް ކުރަން ބޭނުންވާ ތަރިން މިހާރު ވަރަށް ގިނަ އެވެ. އަދި ޝާހްރުކް ވެސް ކުރިން އެކީގައި މަސައްކަތް ނުކުރާ ޑައިރެކްޓަރުންނާ އެކީ މަސައްކަތް ކުރުމުގެ ޝައުގުވެރިކަން ފާޅުކުރަމުން އަންނަ އިރު، އަމަރުގެ ފިލްމަށް އޭނަ އެއްބަސްވުމުގެ ފުރުސަތު ވަރަށް ބޮޑު ކަމަށް ވެސް މީޑިއާތަކުން ބުންޏެވެ.
އަމަރަކީ ޕްރޮޑިއުސަރު ދިނޭޝް ވިޖަންގެ ޕްރޮޑަކްޝަން ހައުސް، މެޑޮކްސް ފިލްމުގެ ބައިވެރިއެކެވެ. އެތަނަށް އޭނަ ހެދި ފިލްމުތަކުގެ ތެރޭގައި "އިސްތިރީ 2" ގެ އިތުރުން އޭގެ ފުރަތަމަ ބަޔާއި "ބީޅިޔާ" އަދި "ބާލާ" ހިމެނެ އެވެ.
ޝާހްރުކްގެ ތިން ފިލްމެއް މިދިޔަ އަހަރު ރިލީޒްވި އެވެ. އެއީ "ޕަތާން" އާއި "ޖަވާން" ގެ އިތުރުން "ޑަންކީ" އެވެ. އޭނަގެ ކުރިއަށް ހުރި ޕްރޮޖެކްޓްތަކުގެ ތެރޭގައި "ޕަތާން 2" އާއި "ކިންގް" ހިމެނެ އެވެ. ރިޕޯޓްތައް ބުނާ ގޮތުން އަންނަ މަހުގެ 2 ގައި ފާހަގަކުރާ ޝާހްރުކްގެ 59 އުފަން ދުވަހު "ކިންގް" ރަސްމީކޮށް އިއުލާން ކުރާނެ އެވެ.
ސުޖޯއި ގޯޝް ޑައިރެކްޓްކުރަން ހަމަޖެހިފައިވާ މި ފިލްމުގެ ކާސްޓްގައި ޝާހްރުކްގެ ދަރިފުޅު ސުހާނާ ޚާން ވެސް ހިމެނެ އެވެ.