ސަލްމާން ޚާންގެ ވަަރަށް ކާމިޔާބު ފިލްމެއް ކަމަށްވާ "ކިކް" ގެ ދެވަނަ ބައިގެ ވާހަކަ ދެކެވޭތާ ވަރަށް ގިނަ ދުވަސްތަކެއް ފަހުން އެއަށް މިހާރު ތައްޔާރުވާން ފަށާފައިވާކަން އިއުލާންކޮށްފި އެވެ.
އެ ފިލްމުގެ ޕްރޮޑިއުސަރު ސާޖިދު ނަދިއަދުވާލާގެ ކުންފުނި، ނަދިއަދުވާލާ ގްރޭންޑްސަން މިއަދު ވަނީ ސަލްމާން މިހާރު ކުޅެމުން އަންނަ "ސިކަންދަރު" ގެ ޝޫޓިންގެ ތެރެއިން "ކިކް 2" އަށް ކުރިއަށް ގެންދިޔަ ފޮޓޯޝޫޓެއްގެ ތެރެއިން ފޮޓޯއެއް ވެސް އާންމުކޮށް ފިލްމަށް ތައްޔާރުވާކަން ކަށަވަރުކޮށް ދީފަ އެވެ.
އެހެންވެ ވަރަށް އަވަހަށް ފިލްމު ރަސްމީކޮށް އިއުލާން ކުރާނެ ކަމަށް ބެލެވެ އެވެ.
މިހާރު ބެލެވޭ ގޮތުން "ސިކަންދަރު" ނިންމައިލުމަށް ފަހު، ސަލްމާން ދެން މަސައްކަތް ފަށާނެ ފިލްމަކީ "ކިކް 2" އެވެ. އަންނަ އަހަރުގެ ފިތުރު އީދުގައި ގެނެސްދޭން ހަމަޖެހިފައިވާ "ސިކަންދަރު" އަކީ ސާޖިދު ޕްރޮޑިއުސްކޮށް، އޭއާރް މުރްގަދޯސް ޑައިރެކްޓްކުރާ އެކްޝަން ތުރިލާއެކެވެ.
މީގެ ބަތަލާ އަކީ ރަޝްމިކާ މަންދަނާ އެވެ.
ދެހާސް ސާދައިގައި ރިލީޒްކުރި "ކިކް" އަކީ ސަލްމާނާ އަބަދު ވެސް ވަރަށް ގާތްގުޅުމެއް އޮންނަ ސާޖިދު މިހާތަނަށް ޑައިރެކްޓްކުރި ހަމައެކަނި ފިލްމެވެ. އޭނަ ޕްރޮޑިއުސްކުރި ގިނަ ފިލްމުތަކެއް ސަލްމާން މިހާތަނަށް ކުޅެފައިވެ އެވެ. ބެލެވޭ ގޮތުން "ކިކް 2" ވެސް ޑައިރެކްޓްކުރާނީ ސާޖިދެވެ.
"ކިކް" ގެ ބަތަލާ އަކީ ޖެކްލީން ފެނާންޑޭޒެވެ.