ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން މާލޭގައި ހުރިތޯ ބެލުމަށް އެމްއެންޑީއެފުން ހިންގާ "އޮޕަރޭޝަން ހިރާސް ފާސް" ގެ ދަށުން ގިނަ އަދަދެއްގެ ތަންތަން ބަލައިފި އެެވެ.
ޑިފެންސް މިނިސްޓްރީން ބުނީ އެ އޮޕަރޭޝަންގެ ދަށުން ފުރަތަމަ ތިން ދުވަހުގެ މަތިން، އިންސްޕެކްޝަން މީހުން ދިރިއުޅޭ 347 އިމާރާތާއި، ނުރައްކާތެރި ކެމިކަލް ގުދަންކުރާ 31 ގުދަނެއްގެ އިތުރުން ކެމިކަލް ވިއްކާ 24 ފިހާރައެއް ބަލައި މަޢުލޫމާތު އެއްކޮށްފައިވާ ކަމަށެވެ.
އެ އޮޕަރޭޝަން ކުރިއަށް ގެންދަނީ މި މަހުގެ 1-15 އަށެވެ.
އޮޕަރޭޝަންގައި ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން ހިންގަނީ ގަވާއިދާ އެއްގޮތަށްތޯ ބެލުމުގެ އިތުރުން، މާކެ ސަރަހައްދުގައި ފަސޭހައިން އަލިފާންރޯވާ ފަދަ ތަންތަނާއި އެ ތަންތަނުގައި ހުރި ހިރާސްތައް ދެނެގަންނާނެ އެވެ.
ކެމިކަލް ގެންގުޅުމުގައި އާ އުސޫލުތަކެއް އެކުލަވާލައި މާލޭގައި ކެމިކަލް ގުދަން ކުރުން މަނާކުރީ 2019 ގަ އެވެ. އެއީ އެ އަހަރު މާލޭގަ ކެމިކަލް ގުދަނެއްގައި ރޯވެ ހިނގި އަލިފާނުގެ ބޮޑު ހާދިސާއަކާ ގުޅިގެން ނެވެ.
މިހާރު ކެމިކަލް ގުދަން ކުރެވޭނީ ހުޅުމާލެއިން ހާއްސަ ސަަރަހައްދެއްގަ އެވެ.