އޮލިމްޕަހުގައި އޮގަސްޓް މަހު ދެއްކި ލޯބީގެ ބިރުވެރި ފިލްމު "ސާޔާ" އައްޑޫ މަރަދޫގައި އެޅުވުން ފަސްކޮށްފި އެވެ.
އެ ފިލްމު ކުރިން އެ ރަށުގައި އަޅުވަން އޮތީ މި މަހުގެ 10 އާއި 11 ގަ އެވެ. ނަމަވެސް ޝޯތައް ދައްކަން ހަމަޖެހިފައިވާ މަރަދޫ ބޮޑޮގޭގެ ކުދިކުދި ބައެއް މަސައްކަތްތަކެއް ކުރަން ހުޅުމުން "ސާޔާ" އަޅުވަން މިހާރު ތާވަލުކޮށްފައި ވަނީ މި މަހުގެ 17 އާއި 18 ގައި ކަމަށް ޝޯތައް އައްޑޫގައި އިންތިޒާމުކުރާ ގްރީން އާޓްސް ސްޓޫޑިއޯ އިން ބުންޏެވެ.
"ސާޔާ" ގެ ޝޯއެއް މިދިޔަ މަހުގެ 5 ގައި ހުޅުމީދޫގައި ވެސް ދައްކާފައިވެ އެވެ.
އޮގަސްޓް މަހުގެ 7 ގައި އޮލިމްޕަހުގައި ޕްރީމިއާކުރި "ސާޔާ" އަކީ ޔޫސުފް ޝަފީއު (ޔޫއްޕެ) ލިޔެ، ޑައިރެކްޓްކޮށް މުހިއްމު ރޯލެއް ކުޅުނު ފިލްމެކެވެ. މީގެ އިތުރު ކާސްޓުންނަކީ އައިމިނަތު ރަޝްފާ (އާޝާ) އާއި އިބްރާހީމް ޖިހާދު (ޖިމީ) އެވެ.
މިދިޔަ މަހު އޮލިމްޕަހުގައި ދެއްކި "ކަމަނާ" ގެ ދެ ޝޯއެއް ގްރީން އާޓްސް އިން މިދިޔަ މަހުގެ 19 އާއި 20 ގައި ގަމުގައި ދައްކާފައިވެ އެެވެ. އަދި މަރަދޫގައި ދައްކަން ނިންމި އެ ފިލްމުގެ ޝޯތައް މިހާރު އޮތީ ކެންސަލްކޮށްފަ އެވެ.